Foodie 生活雜誌

Z和牛Omakase ，將和牛以不同方式烹調，因為唔知食咩，所以由頭盤至甜品，每一道菜都充滿期待，呢餐食足兩小時，好滿意。餐廳在人形町地鐵站附近，因為並非於熱鬧的大街，加上冬日晚上街燈微暗，街上靜英英，以為走錯地方。其實餐廳就在東橫inn 隔壁。餐廳細細間，只有約二十個座位，其中部分係吧枱坐，星期三晚上都坐滿客人，我當然係預先訂位了。

網址 : http://www.zen-wagyu.com

室內就係咁大，一眼見哂

是日餐單預先放在枱面，就如温泉酒店晚餐的菜單般，列明每道菜的材料，我當然睇唔明，只知食材大部分係鹿兒島和牛

點杯可樂，大大舊冰，唔使再添飲

店員一開始叫我地選蔬菜，唔明葫蘆裏賣咩藥，我同友人各自選左淮山，但體貼的店員提議我地每個人選一款，可交換食，結果點左菇及淮山

 燉牛肉  軟稔入味的牛肉浸在香濃的肉汁中，一打開蓋子已香氣撲鼻，都唔得肉汁係咪應該飲埋定只食牛肉，全碗幹掉

拼盤 : 小碟上有和牛壽司、和牛海膽、牛栢葉沙律，伴以金桔。先食壽司，牛肉如拖羅，口感豐腴。和牛包海膽，兩種味道濃郁的食物放在一齊，各領風騷，放入口中滑進喉嚨，大滿足。牛栢葉沙律酸酸的夠開胃，最後食金桔，清味蕾後為下一道菜作準備

放湯 : 年糕配白麵豉湯  我估呢度菜係因為新年關係至有。軟糯的年糕浸在鮮甜的白麵豉湯內，加上一片牛肉，清淡好味

shabushabu  : 牛肉鮮嫩係一定的，但今次主角似乎係鮮竹筍，非常鮮甜爽脆

燒物 : 兩件牛肉分別以味噌及柚子醃，呢碟係仙台牛，老實說，我食唔出鹿兒島跟仙台牛的分別，總之就係好食(呢d咪叫食家囉)。海老芋饅頭，外脆內軟，芋頭粉粉的，好幼滑，好好食

壽喜燒  一大片肥美香軟的牛肉，配上香濃雞蛋，籤破蛋黃後，濃濃的蛋汁與豐腴的牛肉一齊食，非常美味！最後將食剩的蛋汁淋在一口飯上，再加上豉油，白飯都變得滋味。

燒物 燒牛舌，牛舌夠厚，水準當然唔會令我失望

物  今次的牛肉無醃，純粹用鹽作調味，配上之前選的蔬菜，簡單而美味

最後可選醃牛肉沫配茶泡飯或咖哩牛肉飯 我選左茶泡飯，因為實在太飽，清淡點好。肉沫似五香果，頗咸

朋友的咖哩飯，牛肉咖哩似第一道菜燉牛肉，不過再杰點及加了咖哩味，若食得落我會選咖哩飯

最後甜品為葛切 似䈮篛又有點彈牙，浸在冰水中，夾起後點黑蜜食，侍應介紹係新年傳統食品，唔錯。

好滿意的一餐，以為和牛係主角，點知蔬菜都係亮點，清甜可口，錦上添花。套餐一萬yen，另加上消費稅及服務費，飲品另計。牛肉唔係頂級，但以不足一千港銀就可以有唔錯的食物，貼心的服務，個人認為係值得的。