5/2015 光顧
日本菜我多數只食刺身魚生，好少食天婦羅，炸物我老人家唔多接受。不過此餐廳本店在日本好出名，來到香港開分店，虛榮的我又慕名而來，照舊窮風流食午餐。天婦羅全部由主廚関豐一郎先生主理。炸漿即時用高湯開粉製，用最高級的紅花子油，曾經跟旅遊書指引去過東京名店っなハ，但重油煙味食到我頭暈。跟豐一郎先生提起，佢解釋東京的天婦羅多用麻油，炸出來較香同脆，比較重口味，但一宝就用紅花子油，清淡點，又學到嘢。套餐有八款天婦羅，後加天丼及甜品。用料新鮮，每款小小的，但食完又夠飽喎。（窮根深種，仍舊以温飽先行）天婦羅食完後完全無油膩感，喉嚨亦無半點乾涸，令我對天婦羅印象完全改觀。
我之前打過好多次電話都book唔到，後來先知只限每日1430至1730接受電話預約。午餐平均兩星期前預約，晚餐則要三個月前，真誇張。師傅同侍應友善健談，食物又好，言談間仲透露有名人光顧，我地八八卦卦談笑一番，一個愉快的午餐。食完後師傅太太更出到門口道別，認真賓至如歸。
店子細細，只有8個巴枱位加個四人座卡位，一眼見哂。
午餐只得兩種選擇
近日吃日本餐總喜歡點梅酒
先擺個陣式 ：個架用來放剛炸起的天婦羅。有檸檬，鹽，蘿蔔蓉及天婦羅汁作調味。師傅會提議你點食，當然隨你喜歡。值得一提係蘿蔔蓉好好味，待應解釋係用蘿蔔的芯，最嫩的部分磨成。我空口食都食左好多。
簡單的生菜配醃蒜頭沙律 蒜頭鮮甜爽口，好！
前菜 左口魚剌身配酸汁
材料已預備
師傅一臉嚴肅
花竹蝦有兩款 普通及紫蘇葉包。每隻都新鮮彈牙有膏，我喜歡紫蘇葉包的，食味更多層次
此魚與沙𩺬同一系，但師傅強調係日本的與香港不同，當然明白日本x都香d。魚肉嫩滑鮮甜，正！我最愛食的魚之一。
蕃薯露筍粟米 一個字 ：「甜」！唔明日本的蔬菜點解特別甜，尤其係舊栗米，成排放入口，好有趣
舞茸 由一大舊切出來，咬開入面仍然juicy，菇味濃。
墨魚 咪睇成舊刷膠咁款，實質咬落軟糯鮮甜，美味
八款天婦羅後輪到天丼。可點天丼連味噌汁或天婦羅綠茶茶泡飯，我選後者。日本飯加天婦羅紫菜與蝦餅，新鮮山葵，注入綠茶，茶色清澈。師傅建議全部撈勻扒來食，入口咸咸的，有淡淡茶味，加上山葵的清香，天婦羅蝦餅內有蔬菜，好美味的茶泡飯！
最後來一個我最愛的柚子雪芭，完美的結束。
全站熱搜
留言列表
香港食食食 (25)
