喜歡食雞煲，但坊間大部份係重口味的重慶雞煲，好油，我頂唔住。以前好喜歡去食銅鑼灣的台灣一品花雕雞，無咁油膩，可惜關門大吉。今次分享的源徠位置吊腳， 在迷宮一樣的大角咀。鋪仔細細，一眼見哂，由兩位好有heart的年輕兄妹主理。有5款雞煲: 麻香、蜜蜜(加入蜜瓜)、子薑、天麻、鮑魚，$89半隻，$160一隻，鮑魚雞$300一隻。用細雞，雞肉較實，雞皮薄，若肥少少更好。食完雞加湯打邊 爐，點左自家製響鈴，台式墨魚腸，墨丸，金菇同白菜。加多兩罐氣水，埋單三舊水，口渴指數唔高，扺食！同行朋友對墨魚腸好欣賞。可包塲，拍埋哂枱應該坐到十個人左右。最低消費$2500, 除左雞煲，可向廚師Sky 預先order海鮮或其他食物。
同 兩位店主吹下水，廚師哥哥Sky 好鍾意煮嘢食，自己鋪頭晚飯都整煲胡椒湯沙白加燒鷹䱽，再加少少海鮮打邊爐 ，之後再加個冷藏贊歧烏冬放湯，真識嘆。(若你打邊爐點的都係呢隻烏冬，好多地方只會比碟噹噹比你)。通常見d廚師夜晚係求其扒兩啖飯，但佢咁認真，通常 鍾意食，對食物有要求的都，煮出來的食物都唔會差得去邊。問佢有無揾朋友在fb寫下宣傳下，因為我係睇雜誌「飲食男女」介紹，佢話係雜誌自己揾上門，佢唔 鍾意叫人寫，因為每人口味不同，若寫到天花龍鳳，人地來到覺得唔好食仲衰，寧願人地食過好食再介紹。好欣賞佢咁腳踏實地。妹妹candy都好有 heart, 介紹自家雞煲煮法，講下在台灣食完隻墨魚腸回港後再點樣遂間供應商試來貨，真情流露，絶無heart sell。 仲有幫手但無出聲的媽媽同勤快的男友，一家落力經營。我地傾下講下，兄妹仲請我地食沙白，今晚真係似認識左新朋友一樣。又一間心機小店，我一定會再來支持！我覺得食物不俗，但唔係天花龍鳳，有興趣可以一試，外賣都得。
地址 : 大角咀櫸樹街64號富多來商場二期地下13號鋪 (新九龍廣場附近)
電話 : 93871559
小老闆自家晚餐
文章標籤
全站熱搜
留言列表
香港食食食 (25)
