Foodie 生活雜誌

來到行程的最後一日，因為係夜機，所以仲可以玩足一日。收拾好行李退房後先去食個早餐，再作最後shopping，之後就開車去瑞典。喺哥本哈根去瑞典好近，過條橋就到，大概一小時車程左右。其實瑞典好大，我今次特登過一過去，叫做喺自己的旅遊地圖上去多個國家。呢幾年總共去左北歐三次，最喜歡的仍然係挪威，至於瑞典，相信我未必會再來，今次食個扒當去左就算，自欺欺人地話去齊北歐四國😜

住宿位處哥本哈根市中心，係呢個旅程的意外驚喜。之前已提過我哋犯左低級錯誤，訂少左一日住宿，結果補救時就訂左鬧市的民居，叫做感受下當地城市氣息。上次來哥本哈根，曾經喺百貨公司頂樓食飯，望出去見到附近的apartment 好特別，心想若能夠試下住喺入面就好，可能上天聽到我的聲音，特別安排我住左一晚，感恩。Apartment 位處市中心最繁華的大街上，樓下滿滿的遊人，喺屋內望落去，別有一番趣味，不過相對地住喺度都比較嘈。住宿設備齊全，同一般apartment 一樣，反而大厦的設施幾特別，又長見識了。

去大城市旅行喜歡行市內小區，因為小區至係當地人的生活圈，就好似我地日常只會去屋企附近商場，唔會日日去尖沙咀銅鑼灣。之前幾日踩單車經過呢個小區，臨走時決定來逛一圈。下午去Black Diamond Royal Library ，上次來丹麥已經去過，今次個個團友都喜歡逛圖書館，其中團友靚媽仲報埋導賞團，可以更深入參觀，真開心。晚餐去上次唔夠時間去的Torvehallerne Market ，今次再遊哥本哈根，完全補足哂上次想做想去但無法完成的，感恩。

丹麥的城堡比較簡樸，相比法國德國，無咁華麗，所以參觀興致一般。但最令我感興趣的反而係地牢酒窖內的Danish History for Children。內裡有tour，提供worksheet 比小朋友一路睇壁畫的講解一路做wirksheet，印象更深。另外又有填色紙，又可以試穿古裝，小朋友投入感更高，又再一次感受到丹麥對小朋友的重視，堪稱兒童王國。

哥本哈根的科學館，簡直係今次旅程的一大亮點，佔地大，內裡樓高六層，寓學習於遊戲，非常有趣味，大人細路都啱玩，大家都玩到唔捨得走，我只影左少部份遊戲，好多係影唔到出來，只有親身玩至感受到趣味，我地玩足一日都玩唔哂，好厲害。科學館位處海邊的新型商住區，有個靚商場，喺先生陪幾位小朋友玩樂時，我地幾個女人可以去食個lunch hea 下。當中曾有一件可怕的事情發生 ： 話說太太喺玩遊戲時將手袋除下放在地上忘記帶走，袋內有哂佢全家的財物及証件，成個鐘後至發覺，嚇到心都離埋，最後居然攞得番，令我對丹麥人的國民質素加分👍🏻

終於來到哥本哈根，丹麥最著名的城市。今次選擇住市郊，因為價錢較平，哥本哈根市內住宿幾貴，其實城市交通方便，火車、巴士、地鐵都有，唔使住喺市中心都得。入住的airbnb位處市郊住宅區，環境清靜，交通方便，步程20分鐘內有齊超市餐廳雜貨店，鄰近火車站巴士站，踩單車往哥本哈根舊城只需30分鐘，一個生活機能齊備的小區。Apartment 佔大屋的二樓及閣樓，三房兩厠，大廳大廚房，地方整潔，設備齊全，屋主住樓下，方便聯絡，好有安全感。住左幾晚，喺附近買餸煮飯，淺嘗丹麥生活。

一早離開大屋，呢度有段小插曲，話說大家都去左好多次旅行，喺行程安排上叫做老手，但今次居然出現一個低級錯誤 :  book少左一日住宿！最神奇係由平日不理行程的温柔媽發現，總算命不該絕！話說温柔媽前晚無端端睇個行程(佢平日唔會睇)，話今日要離開Vejle，我同太太一直以為係明日至走，若唔係得温柔媽提醒，屋主來收屋時就尷尬死。結果大家從悠悠閒變成急急腳，昨日從legoland回來後立即收拾。

昨日去完legohouse，今日去legoland。一早見到天陰陰，都知無運行，果然去到中午時傾盤大雨。Legoland的面積比我想像中細，而且套用少爺仔的説話 : 「遊戲好bb」。其實都有部分遊戲係刺激的，只係入場時唔識架步。話說當日人山人海，排隊時間頗長，小朋友當然無乜耐性，加上落大雨，遊戲玩得唔多，後段時間更只能躲在禮品店shopping，但我覺得一場嚟到，無理由玩咁少，於是趁細雨時自己出去行一轉，真係感謝上天安排，喺大雨過後好多人離開左，遊戲居然唔使排隊！我立即折返帶小朋友去玩。過程中少爺仔同聰明仔立即跟我起行，反而老闆仔扭扭擰擰，我無想過勸佢，二話不說，轉身走人，點知行行下聽到後面有人大叫，原來老闆仔後悔，叫媽媽同佢追上來，我亦當場教訓佢，機會係唔等人😜大家極速玩左幾個遊戲，䀆興而回。

LEGOLAND 係我的童年夢想之地，小時候去唔到，大個左有能力，當然要一圓夢想，今次仲可以同三個小朋友去，玩得更投入。丹麥係LEGO發源地，與時並進，除左LEGOLAND，新開埋LEGOHOUSE，特別安排兩日玩盡佢，今日先去LEGOHOUSE，九成室內活動，塲內鋪天蓋地的lego 積木，行到邊砌到邊，遊戲結合科技互動，有創意又好玩，加埋master piece 展覽館、放影室及博物館，朝10晚7，全日直落由開館玩到收館，最後買埋LEGO，䀆興而歸。

每次去歐洲都會唔甘心只去一個國家，總會唔蝕底地去埋附近國家，就算到此一遊都好，只為豐富自己的旅遊地圖，好敷淺🤪今次主要去丹麥，丹麥南部邊境接壤德國城市Flensburg，特意安排一日遊，叫做去多個國家。來到德國，當然要去啤酒屋，午餐在此解決，餐後在沿海的城市散散步。接近邊境有個大商場，過左幾日無shopping的日子，兩位媽媽立即醒神，可惜最後都係情歸超市。行完超市就回丹麥。在回程路上，感受到丹麥與德國最明顯的分別係市容的整潔度，當車子在公路上駛過，跨過邊境的感覺尤其明顯。

怱怱離開Moesgaard museum ，就係為左呢間大屋，剛好屋主都要外出渡假，所以要早點交收。大屋係標準海報上的花園洋房feel，三層大屋四房兩厠，超巨型客廳飯廳，連花園露台，再加埋閣樓休息室，完全無敵發夢屋。屋內廚具、衞浴用品齊備，地放整潔乾淨，連雪櫃都放滿食物，屋主好客之道攞滿分。車程三分鐘到達超市，距離Legoland 一小時車程，高度推薦。

今日要離開住左幾日的「家」，一早起身來個最後一次的鄉間慢跑，跑完後再享用自家製熱狗後出發。今日景點係維京博物館，睇下北歐人祖先維京族的歴史。去到場館，幸運地被職員告知海邊正舉辦一年一度的維京節，於是乎一班人行行重行行地行左大半個鐘，穿過森林走到海邊參與盛事。以為整個活動只係擺下攤位做下表演，無想過丹麥人好認真，真係一家大細著哂古裝，搭哂帳幕住幾日幾夜，模仿古代人生活。呢個活動幾有趣，可以露營之餘又有歴史傳承的意義。可惜天氣欠佳，遇著落雨天，大家又無帶雨具，頗為狼狽，不過比小朋友體驗下都好，平日在香港實在太保護了。由於要趕住去下一個住宿同屋主交收，無緣入博物館一看，有點失望。

Den Gamle By喺旅遊雜誌上通常稱呼為舊城區，上次去哥本哈根時，以為Den Gamle By在附近，一問之下至知原來要坐三小時車至到，當時仲無知到以為哥本哈根係咁大，其實舊城區係喺另一城市Aahurs。我又一直以爲Den Gamle By只係一個舊區，同其他歐洲城市的舊城區無兩樣，都係睇下古老建築，行下食下，來到至知原來係大型露天歴史博物館，介紹丹麥從19世紀前到20世紀初的生活歴史，區內的古舊建築係從丹麥不同地方的古蹟遷移到來，仲有穿著古代服飾的人物穿插其中，仿似喺度生活一樣，遊客置身其間，似時光倒流，進入歴史空間。原本以為行一陣就離開，無想到大家都好有興趣，結果行左三個幾鐘，未行完都要離開，原本打算之後到市中心shopping，點知去到商鋪都打烊了，餐廳食物又唔啱心水，結果又回家享受大雜燴。

Plan 行程時見到Aarhus除左AROS art museum 同DOKK1 之外，我都唔知有乜好做，睇資料見到附近有個大城市Aalborg，離Aahurs約一小時車程，就過去行下，做一天無計劃的旅行。去到第一件事係揾餐廳食lunch，今日有食神，揾到的餐廳麵包好好味啱哂麵包痴温柔媽。餐後去左幾個旅遊網介紹的景點，慢慢行下睇下，小朋友無所謂，有得跑跑跳跳就開心，就咁hea下又過一日。

我見識少，從前以為哥本哈根就係丹麥的全部，多得坊間的旅遊雜誌介紹，再加上G神的幫忙，至知道丹麥係有其他城市。Aarhus 奧胡斯係丹麥的第二大城市 (第一當然係哥本哈根），睇到介紹有我喜歡的藝術館（ARoS Aarhus art museum ）同圖書館（DOKK 1) ，決定來此城遊覽。丹麥比我的感覺係型，無論人、建築、設計、時裝，通通都型，所以呢間DOKK1 圖書館，都係一個型字。敞大的空間、舒適的環、內容豐富的圖書館，充分反映出丹麥人的生活品質。晚餐隨意選擇附近的Aarhus street food，不俗的食物配合悠閒的氣氛，又一驚喜，滿足的一天。

經過第一日的轉機日，第二日的休息日，第三日終於展開旅程。早上先喺農莊行個圈，接觸大自然，之後就出城去藝術館同圖書館。當初睇ARoS Aarhus art museum 的資料係被佢屋頂的彩虹走廊所吸引，對藝術毫無認識的我，諗住喺藝術館行兩行，扮下文藝中年就走，點知原來展館又幾多嘢睇，仲要唔小心帶左兩位少爺入色情展館，笑死左(詳情請看內文)，結果唔小心又無左半日。

住宿在市郊，訂屋時網頁話係一個農莊，於是我心中建構的圖像係大屋附近有菜田，豬牛羊雞鴨四處走。點知去到一隻家禽都無見到，而且附近好多間屋，跟我所想的完全不同。實際上大屋在村莊內，係一個小社區，村內真係有羊欄、豬棚，仲有蔬菜田，不過唔係喺附近，因為村莊佔地幾大。大屋距離Aahurs市中心約半小時車程，屋內設備齊全，屋主雖然未有現身，但經airbnb chat room回覆問題非常快。小村莊附近有小型超市，購買一般食材無問題，小村莊環境寧靜舒適，治安良好，好有渡假feel。

之前8小時機程，3小時轉機，再經過6小時機程，17小時後，我終於到達目的地 - 丹麥。丹麥由三個大島組成，包括西蘭島、菲英島及日德蘭半島。今旅程三個島都有遊覽。先去坐落於日德蘭半島上，丹麥第二大城市 : Aarhus 。落機攞車後直駛Aarhus 。沿途大部份時間行高速，經過兩條大橋，午餐在沿途公路上的休息站草草解決，直至到達住宿至可以好好休息，晚餐在附近餐廳用餐，超過二十小時無法入睡，大家都攰了，早早休息。

一年一度港傭出trip，今次原班人馬 :  先生、太太、少爺仔、温柔媽，老闆仔同聰明仔。坐Qatar 航空，架機好新淨，設備新，被安排有個伸腳坐，無咁迫，仲有一小時free wifi，算係咁。先由香港飛6個鐘到多哈機場，轉機停留3小時，因為係凌晨時份到達，唔想成棚人周圍遊，所以買機票時加錢入lounge坐，lounge內有小食提供，基本的shower room 及 sleeping room 都有，hea下食下，時間好快過，夠鐘就上機，迎接我的係另外8小時機程。