Foodie 生活雜誌

2018冰島丹麥遊 遊記篇 Day 6 Dettifoss

離開Borgarfjarðarhöfn後，又係時候揾食，但一路上四野無人，只好問G神。原來離Borgarfjarðarhöfn幾分鐘車程的Blabjorg Guesthouse間餐廳有營業，仲要幾好食，真係命不該絕。往guesthouse 途中遇到路邊的Lindarbakki turf house，冰島的傳統草屋，好可愛，又影一餐。之後喺guesthouse 食完午餐就回程。回程時終於有點陽光，一洗多日來的悶氣。之後到超市買點食物回去煮晚餐，渡過悠閒的一天。

今日係休息日，他他條條喺間屋食完自家製早餐至出門口，旅行無理由要日日趕路嘛。冰島的東部無乜吸引我的景點，求其揾個峽灣去就算，沿途見到喜歡的就停車睇，hea住行，好享受，駕駛員亦可以盡情玩航拍了。其實今日的景點我都唔知係去邊，只係跟住個地名去。當G神話我知到達目的地時，眼前只見到一個好細的碼頭，四週靜悄悄，最開心係有個免費厠所，感覺有點掃慶，但一場來到，點都要落車行下。我係乜鬼都睇一餐的人，見路就行，見梯就上，發現原來呢度係觀賞puffin的海岸，設有觀景台同觀鳥屋，雖然季節不對，一隻puffin都見唔到，但我仍然興致勃勃四圍參觀，呀Q地幻想puffin喺度的模樣。海岸海水清澈，若有陽光的日子來到，一定更美。

住宿為三房一廳大單位，廚厠齊全，有花園，另有洗衫房，提供洗衣及乾衣機，設備齊全，環境舒適。屋主Sara好識做生意。將大屋分成三部份出租，分別係主屋(我租住的單位)，花園小屋及地牢房間，自己則住在主屋玄關旁的房間內。其實又係，Sara一個人住唔哂咁大間屋，分租出去可以增加收入，自己又可以有工作，無咁悶，我睇過佢住的房間，小小的一房一廳，麻雀雖小，五臟俱全，佢話呢間屋就快賣，我以為佢退休，原來佢會搬去另一個地方，已經買左屋，亦係經營民宿，咁始終呢邊唔係咁多遊客，我笑佢係富婆。呢度唔知會經營到幾時，睇下你會唔會成為呢間屋的最後租客。

2018冰島丹麥遊 遊記篇 Day 4  Pakkhus Restaurant 

忘記去鑽石沙灘就係為左食龍蝦，好彩過左午餐時間仲有得食，其實冰島人幾勤力，餐廳中間無落場時間。龍蝦在Höfn 小鎮，鎮上有兩間著名食龍蝦的餐廳，分別係Humarhöfnin Veitingahús及我今次光顧的Pakkhus Restaurant 。其實兩間水準都應該差不多，我兩間都睇過，覺得Pakkhus Restaurant 感覺良好點就幫襯。冰島的所謂龍蝦其實係海螯蝦，比較細隻，同我地食開的波士頓龍蝦唔同，不過都鮮甜彈牙，最緊要係太后滿意，完成佢今次旅程中的其中一個目標。飯後開車往今晚進宿，從Höfn 往Eglisstadir 要翻過一個山頭，一進入小路已經見到前面的車爆左胎，暗暗心驚，小路係沙地，加上微雨大霧，路面又窄又斜又滑，就算見到景色不俗都無謂落車，免生危險，估唔到上到山上就見到有車跌左落斜坡，我地落車問有無需要幫手，司機應該係當地人，見佢都幾從容，見無嘢可以做到就離開了。今晚住大屋，自煮晚餐後悠悠閒hea下就瞓。

Jökulsárlón冰河湖絕對係冰島重要景點之一，感謝上天，今日終於賜我陽光，雖然之前天氣唔好，但去重要景點時有好天氣，感覺上天已經盡做。太后離遠見到冰川已經好開心，到左冰湖就更加自己行左去影相。我一早已book 左boat tour 遊冰湖，同太后揾左厠所，再交代集合地點就走，反正要唔見都會唔見。準時集合，換好衫就上船，坐住橡皮艇遊冰湖都係第一次，之前喺紐西蘭試過坐直升機行冰川，海陸空都集齊了。橡皮艇在浮冰間穿插，職員一路講解冰川生態，當然唔少得地球暖化問題，真係「冰川融化，人人有責」。我英文差，只聽得明一部份，反正唔多明，用心欣賞美景好了。

酒店在山腳下，酒店範圍內有好幾間小屋，但房間及餐廳都在主樓內（箭咀指住）

午餐後開車往Fjaðrárgljúfur(峽谷)，沿住一號公路行會經過兩個景點 : Laufskálavarða叠石陣及 skaftareldahraun 苔原，我去之前只在網上見到呢兩個地方，無話特別要去，所以無入GPS，不過沿路就見到，總之見到有人停車駛埋去就係。Laufskálavarða叠石陣佈滿許願的叠石，整整齊齊一排排，佔地頗大，聽講真係由不同人叠，真係好懷疑係咪真係有咁多人喺不同時段來許願之餘又會整得咁靚？沿路兩旁都係苔原，好少見到咁多青苔，感覺似喺另一個行星，不過唔可以行入去，可能因為咁，所以有skaftareldahraun呢個觀光點。景點在苔原內設有步道，大家可以係步道上近距離接觸苔原，不過其實若你係自駕，路上都有好多停車處可停低睇到。不過呢度就可以喺唔傷害苔蘚生態下走入苔原中。

住宿離Seljalandsfoss只有十零分鐘車程，諗住就算當日唔夠時間去Seljalandsfoss，第二日可以補番，而且比起附近的住宿價錢，呢間算平。住宿地方位於公路旁的山腳下營地，有十幾間供二人入住的小屋，另有幾間兩房的木屋，營地簡單無設施，似一個驛站。積木般的小屋雖然外表似臨時房屋，但內裡基本設施齊備，不過入住後記得立即check 清楚熱水暖氣供應有無問題，因為我當晚想要多個暖爐，晚上係無法聯絡職員的。

今日正式踏上自駕旅程，食完自家製早餐後，依依不捨的離開小屋，友善鄰居請我食朱古力同我say goodbye，so sweet。起程直駛黃金圈，應該超過90%來冰島的人都會去的超級熱門旅遊點，俗人如我，當然會去啦。先去版塊裂縫Thingvellir National Park，差不多到達時經過P3 停車場，落車睇下，發現行入去都係裂縫，唔蝕底行左先，行到盡處有瀑布，風景一般。行完後去官方景點，好熱鬧，我望下就走左。黃金圈係超級旅遊點，非常多人，建議早點到，否則無車位。離開版塊裂縫Thingvellir National Park，開車去黃金圈第二站 ： 間歇泉Geysir 。景點位於温泉地帶，地熱區就似日本的温泉地獄谷，最特別係個間歇泉，每幾分鐘會噴發一次，力度猛，有幾層樓高，都幾壯觀，不過亮點只得一個，基本上睇完就可以走。中午時分，原本想喺觀光店的cafe草草食個午餐，但實在太多人，團員唔太肚餓，決定去埋黃金瀑布先。去到黃金瀑布，照舊人頭湧湧，但呢度終於令我有到左冰島的感覺。瀑布面積大，水量足，氣勢磅礴，總算不枉此行。之後在路上揾餐廳，可惜附近無啖好食，結果食左餐又貴又唔好食的午餐。

此住宿當選為美魔女心目中的全程最喜歡住宿。整間屋外形似一艘船，室內裝飾成船艙一樣，帶點vintage感覺。地方舒適，設備齊全。屋主好nice，在check in 時已對小屋作出詳細介紹，隔壁的鄰居係屋主好友，友善的鄰居更加喺晚上披住張氈來提我等極光，雖然結果睇唔到，但都好感動。

連埋轉機等侯時間，15小時後終於由香港到達冰島，難得太后仍精神奕奕，讚👍🏻。抵達後先去攞車，因為睇過網友分享話冰島的車損耗厲害，攞車時要check 清楚，避免還車時爭㘭，所以我地都睇得好認真。搞完一輪，出到市區已經係中午，先醫肚。介紹話冰島有開好出名的熱狗店，反正就在我地超市入貨的商場內，就以熱狗當午餐，好彩太后無嫌棄。今日無安排景點，因為知道長途機後大家都會攰，喺超市入完貨，行下附近的店鋪，又未夠鐘check in, 於是去埋Perlan就開車往今晚的住宿。

今次的組合有點奇怪，原本係意大利之旅的班底再次結伴同遊，之後加入太后，後來因為另一位朋友未能隨行，結果團員變成我、駕駛員、太后同美魔女。事前已跟美魔女坦白與太后同行的種種不便，加上睇埋我的太后語錄及平日我向佢呻的種種，佢仍然肯接受挑戰，簡直係勇士。凌晨機在香港出發，在機塲的時候，聰明的美魔女已看出呢團奇特的節奏 : 心急的太后加龜速的駕駛員。即係若你行一條直線，太后一定係最前，駕駛員在最後，我同美魔女在中間，距離係N咁多個馬位。所以美魔女已暗暗地做好準備mark 住太后，我就負責催促駕駛員，一個不合節奏的旅程正式展開。

十八日十七夜的冰島丹麥之旅，冰島為環島自駕遊，共十三天，丹麥只停留哥本哈根四天，使用公共交通工具。

冰島主要環繞一號公路而行，路況良好，南部景點集中熱鬧，睇冰湖瀑布(其實瀑布周圍都係)，東部寧靜，觀鳥看峽灣，北部有鑽石圈，西部睇海岸大石、火山，係攝影者的天堂。秋天來到，動物較少，puffin 都離開了，海豹亦無去沙灘哂太陽。聽講秋天唔係旺季，但熱門景點都有好多人，旺季時唔知點算。