Foodie 生活雜誌

8/2023 光顧

餐廳開左好多年，見評價唔錯，一直想試下，港式燒烤店，睇menu就知店主對餐廳好有感情，將自己開店的相片與感受加入menu，結合成小册子咁，好少見。燒烤出品一般，燒得有點乾，調味感覺係將一堆調味料隊落去，唔均勻，味道亦唔啱我，而且食價比唔高。我見餐廳有駐場唎酒師，好多清酒介紹，應該有一班飲酒熟客，否則點開到十二年？

7/2023光顧

地址雖然話係大角咀，但實際應該係太子尾，深水埗頭，雷生春附近。有次去鮨店食飯，聽師傅話放工會過來食消夜，所以跟佢揾食。小店賣串燒，細細間，我因為唔肚餓，只點左幾串，食材及火喉都一般，而且剛剛喺日本食完，忍唔住不公平地比較，無論價錢同水準都差一截，試過就算。不過值得一提係餐廳開到午夜一點，今時今日好珍貴了。

7/2022光顧

又一間日本過江龍，主打鳥割烹Omakase，好似香港未見過有類似的餐廳，見多位blogger都話正，驚遲下變預約困難店，一於食左先。口味嘅嘢真係好個人，人地講得幾好都無用，始終自己食的至係真。餐廳用鹿兒島黑薩摩雞作食材，由師傅於席前以雞的不同部位做出不同款色的雞料理。套餐共有十六道菜，看似豐富，但食落就覺得華而不實，菜色唔覺特別，味道亦唔突出，餐具都係普通，即係色香味都一般。價錢唔平，我寧願老老實實去燒鳥店食串燒好了，叫做見識下囉。

6/2022光顧

1/2022光顧

食過同集團的幸福鳥，印象不俗，加上呢間可以用coupon，所以試下。我食雞串為主，雞肉唔夠juicy，串燒火喉控制唔好，燒得唔夠香，調味亦唔到位。當然餐廳賣點又係一半價錢去左個海景度，所以我用coupon後，以一半價錢食就勉強合理。其實有無coupon都唔使來😅不過服務好，係餐廳唯一可取之處。

1/2022 光顧

近排喜歡食串燒，試左好幾間，呢間感覺最良好。從訂位開始已覺得服務好，侍應有禮貌，主動為我安排吧枱角位，方便傾偈。裝修企理，窗明几淨，抽風系統好，無燒烤店的強油煙感。食材質素及味道均不俗，燒物火喉控制得好，串燒選擇多，雖然收得早(9點半左右），但無話分兩輪，價錢合理，飲飽食醉都唔肉赤，食得舒暢。

12/2021光顧

一條友，想簡單食個晚餐，又唔想太飽，食串燒係一個好選擇。見到門面古代中國風混日本風，幾得意，推門而入。室內佈置好日本，餐廳由三位女士經營，原來開左三十年，從無轉手，真係從少女做到變阿豬媽。食物質素普通，家庭式手作仔咁，食幾串串燒，點杯梅酒，覺得自己好麻甩。

11/2022光顧

尖沙咀棉登徑根本係一條食街，短短一條街兩邊全部係餐廳，剩係串燒店都有三間。今次選擇木户，係因為行過被店面個小門口吸引，感覺好日本。餐廳由日本師傅主理，標榜選用日本雞，室內裝修精緻，氣氛好好。不過無論串燒的火喉、食物的味道、食材的質素都一般。有多款菜式選擇，串燒、一品料理及串揚都有。另有special menu，要問侍應至有。餐廳係荔枝角鵜舞居酒屋的姊妹店，隔離的鮨白鳥亦係同一集團，餐廳好旺塲，平日都要分兩輪，侍應話星期五六要提早兩星期訂位呢。

9/2021光顧

餐廳提供串揚及一品料理，以小食為主，多款清酒及cocktail供應，全店只得十四個坐位，係乾淨版居酒屋，以前開通宵，好多壽司店的師傅放工後來食宵夜，我都係喺佢地口中得知有呢間店。串揚薄薄的金黃色炸漿包住食材新鮮，炸得乾身香口，款色多，又有時令食物，間唔中食下都幾有趣。餐廳好受歡迎，因為疫情關係，只營業到晚上十點，但加開午餐時段，分12點及3點兩個時段，不過今年的晚餐及星期六的booking已滿，下年的booking 喺12月1日早上接受預訂。(而家喺香港食飯好似精神病咁😭）

5/2021光顧

好喜歡大埔區，間中會入去行下，成日話老左要移民大埔🤣 區内好多小店，呢間之前經過話想試，結果兩年後至食，等做我生意就死得。小店好的式，裝飾得好有心思，好有日本車站居酒屋feel，餐點選擇多，串燒、一品料理、鍋物，乜都有d。食物味道偏濃，出品一般，但勝在氣氛好。小店熟客多，老闆娘爽朗熱情，成晚滿塲飛，又請飲酒，同客人似老友聚餐，好有小區風情，餐廳提供包塲服務，萬三蚊最低消費都好多人包，大埔區的消費力真強👍🏻 

4/2021 光顧

10/2020 光顧

串揚，即係炸串，原本想去的一間無位，見呢間評價不俗就試下。居酒屋形式，除左串揚，餐牌上仲有串燒、前菜、主菜及甜品等，菜色選擇大路，食物味道唔突出，串揚串串味道一樣，串燒香味不足，油膩有餘。不過當晚幸運地獲餐廳提供房間，我地幾個朋友可以放鬆地開懷暢飲，雖然食物水準一般，但服務及氣氛都唔錯。

11/2019 光顧

居酒屋之前亦係串燒店，轉手後仍然係串燒店。當晚由善長請客，菜式由善長發辦，我又掛住同兩位公主玩，無仔細品嚐食物。印象中小店有多款前菜，頗精緻，串燒火喉適中，味道不俗，house wine 易入喉，整體水準不俗。

7/2019光顧

某日喺尖沙咀諗唔到食乜，諗起K11呢間新開的串燒店，即管碰碰運氣。一般中價連鎖日本餐廳格局，標榜用日本四國出產的阿波尾雞，講真我就食唔出，師傅對火喉掌握功夫不俗，皮香肉嫩，餐牌上有港式創作的串燒，例如馬蹄鮮魷燒肉棒，我無嘗新的精神，留番各位試下。整體而言，係一間不過不失的串燒店。

11/2018 光顧

7/2018光顧

唔係朋友介紹都唔知有呢間小店。土瓜灣北帝街有好多不同食店，不過都係街坊食品，無想過有間日本串燒店。小店門面低調，細細間，三十個座位左右。氣氛不俗，食材選料認真，食物出品有水準，廚師用心，串燒燒得有心機，款款都外皮香脆，內裡juicy，味道適中。而且價錢合理，可以放心點菜，侍應友善，小店係同朋友把酒談天的好地方。由於廚師只得一人，上菜速度較慢，不過食串燒就係慢慢傾慢慢食，我覺得問題不大。（有時好矛盾，因為食到好的餐廳會寫得特別多，浪費自己時間😫所以希望大家都比少少時間睇埋相內分享吖😘）

9/2017光顧

(幾鍾意佢個串燒公仔logo，好可愛)

4/2017 光顧

5/2016光顧 

睇雜誌話尖沙咀鳥燒居個師傅在元朗自立門戶，雖然山長水遠，不過就當遊車河，過來試下。菜牌好精緻，選擇頗齊全，一般沙律、一品料理都有，咁主角當然係串燒。除左串燒，仲有時價海鮮爐端燒，咁貴我當然無食，串燒都係一般串燒店的選擇，食材質素高，每串都燒得皮脆肉嫩又juicy。若住喺元朗都不失為一個好選擇，但區外人就未必要特別入來，因為價錢質素跟銅鑼灣的餐廳差不多，起碼慳番交通費同時間。