9/2018光顧
鮨店喺香港不停開，愈高級的開得愈多，曾經有日本師傅同我講，香港係東京以外最多鮨店的城市，香港人真幸福。呢間開左唔夠半年，口碑不俗，一般高級鮨店格局，地方精緻，只設壽司吧枱及額外一張四人枱。由日本人中本師傅坐陣，另一位師傅都係日本人。午市提供$800 omakase 或$580十二件壽司套餐，加一另計。本來想點Omakase，但侍應同師傅都建議食壽司套餐，我因為大食，另加錢加多三件，共15件。我話要追加時，師傅問我幾多件至夠，我話15件，佢以為我要再加15件，嚇到眼都突，好好笑。壽司刺身魚肉緊緻柔軟，好新鮮，選擇大路，可能剛入季，刺身未夠肥美。我覺得食材質量其實間間高級鮨店差不多，不過呢間的壽司飯我好有印象，飯粒分明，温度剛好，同壽司醋融合，好好味。不過侍應只懂得簡單日文，未能同師傅溝通，唔能夠為客人傳達訊息，有點失敗，可能鮨店開得太多，請唔到人。
4/2018光顧
之前食過午餐，覺得食材、出品同環境都唔錯，決定試下晚餐。結果有點失望，晚餐的壽司同午餐一樣，其他的酒肴唔突出，唔值得我再花一倍價錢去食，都係食午餐就好了。食完之後好有空虛感，之後要再食一餐壽司補數。
4/2018 光顧
餐廳雖然位處中環，但絶對唔係一間高規格的鮨店。吧枱後面似雜架攤，若你去日本人主理的鮨店好少係咁，就算唔高級都起碼整齊，店員至師傅都似茶餐廳伙記。壽司一路食一路有好熟悉的感覺，原來兩位師傅都來自另一間我曾經食開的鮨店，難怪所有壽司做法熟口熟面 (不過整體質素有差距)。壽司做法花巧，雖然食材不俗，但醬油過多，完全蓋過魚的鮮味，食濃味的魚還可以，若食白身魚就好受扞擾。食左幾件已經叫師傅落醬輕手d，但唔知係習慣定唔啋我，無改善。不過百客遇百貨，呢餐起碼食得飽 (要求愈來愈低😭）。
1/2018光顧
餐廳隱藏在小巷，店名好繞口，原來已開業7年。小店由兩位日藉師傅主理，再加一位好喜歡摺紙的侍應小姐，鐵三角，一腳踢，似家庭式料理。水準唔係好高，但食材新鮮度可以，最重要係極抵食，唔明點解仲要去食質素差的連鎖壽司店。餐廳逢星期日休息，假日開半晏，午餐至兩點，但侍應小姐話有時點半就關門，店主比較率性，去之前最好先致電查詢及訂位
7/2016光顧
又係午市幫襯，不過今次食Omakasae ，繼續新鮮好食，五款刺身一款熟食加八款壽司，烏冬唔包，係我唔夠飽師傅加比我，之後我又嫌杯咖啡太細，又要多杯，滿足哂我貪小便宜性格。
4/2016光顧
經過之前幾間唔多滿意的壽司餐，今次終於食番餐似樣的。餐廳位置吊腳，在希雲道尾，掘頭巷，門面低調。店內有鐵板燒及壽司吧任君選擇。午市套餐價錢唔平，但用料新鮮，師傅友善 （因為送左件壽司同杯雪糕我食），水準唔錯。食材質素高，今次食12件壽司餐，套餐照舊有沙律菜碗蒸麵豉湯咖啡樣樣齊，跟餐的稻庭烏冬木魚湯底夠香，值得一讚。全餐雖然無驚喜，但食得舒服，可以再光顧。
2/2016 光顧 壽司淳@灣仔
食之前，睇雜誌介紹得好精彩，食之後，睇另一本雜誌介紹都好精彩，只係我光顧的時候唔精彩。餐廳食材新鮮品質高，但問題喺師傅度。話說serve我的師傅見佢手震震咁，加上處理刺身的方法，我已經有離坐的衝動，可惜已落單。刺身新鮮，所有壽司已做調味，不過就唔多合我心水。最激氣係由另一位師傅serve的客人與我食同一個餐，居然部分食材同壽司處理方法係有分別！我作出反映，店員話呢d就係omakase 的分別，下次比番雙倍我，但我食的係套餐，成五舊水一個餐，價錢與水準不成正比之餘仲要用料有差別，絕對激氣。我唔好彩遇師傅不淑，浪費左我的時間與金錢，無左一餐仲要激鬼氣。若果你想去，一定要選出名的兩個師傅，但我都唔會再去，當日感覺太差
8/2015 光顧
又係時候講再見。人望高處係應該，但發展得太急就未必好。食Omakasea都係想食師傅手勢，但一個師傅serve 16人，只負責切魚，其他都交比助手做，我坐著看以為去左工廠，一餐飯價錢唔平，若師傅唔能夠專心，就算材料幾靚都大打折扣，由開業至今都幫襯左年幾，係時候暫別，離開是為了回來，希望他日再遇，你會更上層樓。btw，各位有無心水日本菜推介？
香港食食食 (25) 遊世界 (0) 漫步香港 (3) 小書架 (1) 私影院 (1)
