Foodie 生活雜誌

睇到介紹，感覺良好，即管做白老鼠試下。去到見到裝修靚靚，但星期六午餐我一人包場，再睇開飯網百幾個笑三個喊，預左中伏。幸好出品可以。日本師傅喺東京做左十年，之後喺泰國做左幾年，年幾前開始喺度做，套餐係有割烹元素的壽司餐，整個餐的食材及賣相都唔錯，師傅好有心機，不過食價比低，個餐原本無海膽，要另外加錢，係師傅見食材有剩至請我食。

剛剛開始食壽司套餐的時候，除左見城、壽司廣之外，呢間係我幫襯的其中一間。餐廳應該定位中價市場，因為當年的$178遂件揀套餐而家都仲有（😱），不過變左二百八，喺間間鮨店都做緊高級套餐的今日，呢度係食lunch 的好選擇。十幾年後的我都升左級食晚餐……只因有人請🤪 餐廳食材新鮮，但並不突出，好普通的一個晚餐。最突出係個師傅，老好文師傅仍然豪邁爽朗，親切好客，同客人打成一遍，雖然菜式普通，但都係有水準的。有時候食飯除左食物以外，客情都好重要，讓客人有賓至如歸的感覺，可能就係餐廳經營多年仍咁受歡迎的原因。

2/2023光顧

之前食過午餐，印象好好，想再訂午餐要等好耐，索性訂個晚餐。食材新鮮肥美，除左第一道九繪魚（即龍躉）有點乾之外，全晚的食物都滿意，師傅有交流又捨得用食材，只整體水準滿意。可能近日客人去哂日本所以易訂左，已book左之後的午餐😁😁

12/2022光顧

預約困難店，午餐要幾個月前訂，仲要落訂，真誇張。一出𨋢門口無招牌，似未裝修好，入到店面又一股醋味，坐低後師傅話要等陣，因為飯未煮好，第一個感覺唔多好。好彩食落又唔錯，食材新鮮，師傅毫不吝嗇，刺身大大塊，味道處理不俗，最滿意係套餐有十五件壽司，好多都係得十或十二件，十五件對於我就剛剛好。若果唔係難訂位，我會再來。

6/2022光顧

城中熱門鮨店，出名難訂，我呢餐係半年前訂，仲要full pay，no refund ，只可改期，好巴閉。食材唔算特別，但水準高，處理有心機。師傅風趣，對食材認識深，不停講故事，可愛的侍應用心翻譯。由於師傅跟日本的買手關係好，可以攞到靚食材，夏天都食到肥美的魚。聽師傅講同買手溝通的過程，似睇電影「潮拜築地 魚味無窮」。食完後整體感覺良好，但又不至於好突出，若唔係太難訂，我或者會再食，不過今年訂位已滿，下年訂位又未開放，食餐飯要食到輪米咁就無謂，又唔係平，見識過就算了。

3/2022 光顧

與食開的「旭」隸屬同一集團，「旭」的明師傅過左來呢邊開新店。小店只有12個座位，坐得舒服，有兩位師傅，當日每位師傅負責兩組客人，服務恰到好處。食材新鮮，水準平均，出品踏實無花巧，唔會有驚喜但亦唔會差。簡單食個壽司套餐，價錢合理，就算追加都無負擔，想食乜就同師傅講，好casual ，感覺良好，可以一試。

9/2021光顧

而家喺香港食飯好恐怖，名店full到滿瀉，呢餐都係臨時攝位，餐廳搬左，師傅都轉埋，原本的chef mori 走左， mori 走左，餐廳改名雲隱，由健師傅主理。健師傅喺mori 北角店已幫手，如今升格為師傅，戥佢開心。食材仍然優質，但口味偏重，今餐的亮點係大蜆，唔係成日遇得到。自10月起開番午市，師傅話午市會做番多點傳統江户口味的壽司，就等健師傅慢慢建立自己的風格吧。

5/2021光顧

香港鮨店多如繁星，質素參次，雖然食開一間，但有時又會試下其他，通常睇下食評睇下相，合眼緣就去，今次試呢間。由香港人師傅主理，食材質素不俗，看似簡單，無話煙燻火灸，但又處理得有心機，穩陣的一餐，可以再試，睇下可唔可以做日常店。

4/2021光顧

餐廳開業時由日藉chef主理，主打西日料理，當時想試但又唔捨得，始終千八蚊一個set，睇相又似食唔飽。時移世易，餐廳已改為日本餐廳，網上風評不俗，加上有foodie友介紹，所以遠到西貢都來試下。餐廳環境好好，食材高質，食物味道唔錯，師傅之前做開懷石料理的廚部，睇佢握壽司的手勢都知唔係師傅級，若以鮨店標準去食會失望。今次我食Omakase set，有壽司、刺身，雖然只得一項炸物，但做得幾出色，師傅都話佢做料理比較好，有機會再去的話，我會叫師傅自由發揮，我有乜食乜，睇下會唔會有驚喜。

2/2021光顧

12/2020光顧

9/2020光顧

食開的鮨店長期full，又要揀其他鮨店落户。呢間午市15件壽司set價錢合理，刺身新鮮，味道ok。餐廳座位多，當日可能唔夠師傅，serve我的chef非常忙碌，全程幾乎零交流。見到刺身全部由chef分發， 再由其他師傅或助手做壽司，似工廠出貨。食到最後得知原來當日有幾枱客趕時間，搞到師傅要趕出餐，整個流程亂哂，難怪見到chef心浮氣躁。午餐食材唔錯，仲包甜品，我覺得物有所值，要求唔高都可以試下。不過食客太多令服務質素未達標又有點頭痕，去多幾間再決定。

9/2020光顧

一坐低想訂下次已被告知fully book 到明年7月，之後的訂位亦暫停。今次一別，唔知幾時再相見，唯有好好享受當下。當晚多款菜式都未食過，仲要食極都有，有今生無來世咁款，絕對滿載而歸，大滿足👍🏻

4/2020 光顧

2/2020光顧

自從mori san唔做午市，我又要揾過間食午餐的鮨店。今次試呢間，同一楝大厦已有3間鮨店，競爭大，難怪話香港係除左東京以外，最多鮨店的城市。餐廳生意好好，艱難時期都坐滿客人。廚師發板壽司定食彈性高，六、九、十二、十五、十八件選擇都有，所有胃納都照顧到，香港人的靈活本色。食材不俗，處理頗有心思，價錢合理，不過以鮨店來講，衞生程度有改善空間，由於食唔到我想要的魚鮮味，我要繼續尋找了。

7/2019 光顧

還是覺得你最好。唔係誇張，唔知點解，我只可以喺mori san 手上至食到海產的魚鮮味，香港我試過的鮨店都店食唔到，同主理人mori san 講，佢講笑話可能因為自己無洗手🤣

6/2019光顧

食左兩次午餐，覺得水準不俗，有信心來食晚餐。晚餐款式多，當晚共有22款食品，師傅設計菜色有心思，用心煮，好有心機同食客分享製作過程，睇得出對料理非常有熱誠，食材豐富，海膽都有4款提供，但大部份食材都經過處理，魚類喜歡以熟成處理，味道較複雜，食唔到想像中的鮮甜味，師傅好緊張自己的出品，努力地介紹刺身出處及製法，我似上堂多過食飯，唔多合我心意，都係來食午餐好了。

3/2019光顧

2/2019 光顧