Foodie 生活雜誌

今日又係老爺的受難日，6小時長途車，始終成車婦孺，老爺想盡量喺入黑前到達，所以見佢都有點緊張。但無可能六小時直踩，就算揸車的捱得住，小朋友都頂唔住，所以中途去左有塘鵝睇的 Entrance 鬆一鬆，仲食 左個好好味的炸海鮮盤。

昨日的黑氣似乎已經過去，一早去屋主介紹的咖啡店social ground食個豐富早餐，除左例牌美味的雞蛋同牛油果以外，仲有好好味的muffin ！其中的白朱古力士多啤梨麥加果仁muffin，好味到預訂第二日再來食。食完早餐行過對面見到有個grower market，新鮮靚仔的農作物似對住你笑，齋睇都覺得有幸福感。之後去附近的lighthouse beach 散步，藍天白雲，真係點睇都靚。睇完又到午餐時，喺市中心午餐後比我地遇到市集同澳洲卓悅，餓左幾日未能shopping 的三個女人立即如狼似虎，可憐的老爺同三位小朋友只能乾等。唔知點解每日的時間都過得好快，行一陣就天黑(係咪真係一陣?) 回程時經過另一沙灘欣賞晚霞，簡單的又過一日。

餐廳係區內熱門之選，似我地的茶記

(大屋外表樸實，旁邊的尤加利樹會有樹熊出現....若你幸運遇見的話)

2017澳星遊 Day 6 Gold coast - Port Macquarie

今日揸番車上Brisbane ， 老爺晨早起身打霧水兼釣魚，連埋昨晚放喺水入面的蟹籠，兩者皆無收穫，海鮮早餐無望，只好去附近cafe食早餐。款款大大份又好味，午餐都慳番。揸個零鐘車去Lone Pine Koala Sanctuary，嚟到澳洲一定要同樹熊袋鼠打個招呼。動物園開左好多年，設施簡單，地方大，分好幾個區域，若果要行哂都要大半日，我地只參觀左自己有興趣的部份。首先當然係要抱樹熊，可惜原來要先買飛，我地無買，只能企喺樹熊隔離影相，不過都好開心。園內的樹熊好生猛，同其他動物園內只會瞓覺的樹熊唔同，佢地在樹上行來行去，仲會跳！之後去餵袋鼠，睇埋tasmania devil，幾種澳洲獨有的動物就走，可惜見唔到wombat😖

昨日太勞累，今日無morning call，安樂醒，但晨型人的我都係雞啼咁早起身打霧水。大人先起身煮早餐，小朋友都陸續起床，趁煮早餐時，小朋友在花園踢波，之後少爺仔同小老闆跟老爺學煎蛋，我陪聰明仔喺車房踢波順便混熟下，大家輕鬆享受一個relax 的早上，結果成十一點至出門口。

今次旅行係一個全新組合，一行七人，包括四名成人 （老爺、奶奶、靚媽同港傭）三名小孩（小老闆、聰明仔同少爺仔)，兩個家庭加一名港傭，浩浩蕩蕩出發。出發前大家都非常擔心幾個從未坐過長途機的小朋友會好辛苦，因為從香港到新加坡到澳洲，足足十二個鐘，三個小朋友居然無扭計，喺新加坡半夜轉機睡眼惺忪都肯跟住跑，新加坡機場好大，我地轉機要行好遠，由T1去T3坐左3次無人駕駛列車，上機後又由頭瞓到落尾，真乖。

2017澳星馬遊簡報 : 

今次全程親子遊，行程只有大概，訂好住宿就沿路行到邊玩到邊食到邊，四個大人加三個年齡由四歲半至六歲半的小朋友，（歲數要準確，否則會被小朋友立即更正）。結果我地在澳洲近距離接觸塘鵝、樹熊及袋鼠，每日享受到藍天白雲好天氣，睇到彩虹及夢幻的銀河，去左幾個好好玩的免費公園攀爬，睇過美麗的海灣、壯麗的山谷，坐過刺激好玩的纜車，食過新鮮的食材，在星加坡去左唔使排隊任玩的legoland，再加上每日可以睇電視、打機、開懷大吃零食、雪糕、飲果汁，一個完完全全屬於小朋友的假期完滿結束。