Foodie 生活雜誌

(下雨天，好襯黑白色的門面)

感謝團友的成全，落住大雨都肯特登坐的士來同我食個早餐，真係人生有個真正旅伴的確好極！餐廳的pancake 唔係賣空氣感，不過都係軟綿綿，而且係呢個旅程中三間pancake 店中最有蛋味的。雖然係好出名，不過就唔係我的心水，我都係喜歡疏乎里feel。又或者係同一問題 : 早餐時段食唔到招牌的pancake?

喜歡關西風的天婦羅，來到京都無論如何要一試。可惜首選的京星裝修中，不過百老店八坂圓堂都出名，講真，我都係慕名而去，以我的level，應該都分唔出兩間名店的分別。一早已經在網上訂定位，收到確認電郵時寫到明遲到一分鐘都會被取消訂位。其實就算唔寫我都一定唔會遲到，不過寫到咁又真係感覺唔良好，而家去日本訂位就係會受到呢種對待，有時都覺得自己犯賤 。被安排於老房子內的廂房用餐，好有風味，由年輕師傅主理，一次招待三組客人，食物炸漿薄，材料新鮮，不過可能師傅尚欠經驗，天婦羅帶點油膩，尤其係最後的茶漬飯，不太突出的一餐，讚賞女侍們服務態度好好。

京都最熱鬧的地方應該集中喺京都站，三条四条一帶，比較起來，二条就悠閒得多，滿街型格小店。記得曾經特意來一保堂買茶，之後就離開。原來附近好好逛，可惜今次又係唔夠時間，下次，下次一定要來好好的逛個飽！

(門口種滿植物，帶點熱帶雨林氣息)

舞鶴，只睇名字已經覺得好靚，心中即時想起飛舞的仙鶴，好有仙氣。事實卻剛好相反，舞鶴係一個軍港，主要發展工業，充滿剛陽氣。我對軍事歴史等題目無興趣，來參觀只因紫陽花，今次旅行踏正紫陽花期，舞鶴自然文化園係京都區內最多紫陽花的景點，十萬株紫陽花開滿整個山谷，身處其中，頗有置身童話國的感覺。

舟屋只於11-3月入住才提供晚餐 (獅魚及活蟹），其餘時間只提供早餐。屋主在我訂房時一直都係呢個條款，但在我入住前一星期，突然提出有一泊兩食plan，不過晚餐就會在村內的餐廳海宮進食，費用係原本計劃加一萬yen。我一直猶豫不決，唔知點解總係對間餐廳有伏的感覺，但因為小漁村晚上揾食艱難，嘗試過book其他餐廳都無位，又唔想食杯麵，結果都食左。呢一餐亦為伊根之旅留下左瑕疵。海鮮食材毫無鮮味，餐牌同師傅的手藝都令我感覺求其，以一萬yen的價錢食呢餐，我只覺非常不值。(或者可以考慮不經屋主直接向餐廳訂位，點個普通晚餐，價錢平一截，套餐內容當然唔一樣，但以餐廳質素，點d但求飽肚就算的餐就可以了)

對於我，旅途上的住宿都係景點之一，難得來到小漁村，一早已鎖定要入住當地特色的舟屋。舟屋係漁民的家，依水而建，漁船泊於屋前，方便出海捕魚及維修船隻。近年有部分舟屋已改建為民宿，提供一泊二食。今次入住的舟屋設計簡單，每次只招待一組客人，我同團友包起成間屋。假如你問我伊根好玩嗎？我會話若只係來一個下午，其實係無嘢好玩。我會選擇住一晚，漫無目的地散步放空，晚上在寂靜的海灣欣賞漫天星宿，感受更深。

伊根町，京都府北部的海邊小漁村，無火車站，要靠巴士或自駕到來，可能因為交通不便，遊客唔多，有點與世無爭的感覺。從天橋立坐一小時巴士入來，沿途上車落車的都係老人家。漁村小小的，只有二百多間舟屋，沿海而建，村內無便利店，只有小型士多，數間餐廳，一個道之駅、小小清酒廠、神社等，睇落幾豐富，實際上就算慢慢行，最多一小時都應該逛完。由於開始致力推動當地旅遊，新近落成幾間舟屋，命名為「舟屋日和」，今年4月開幕，內有餐廳及咖啡室，旅遊中心等，伊根灣遲下應該會變得好熱鬧。好多遊客會連同天橋立作一天遊。但我就選擇停留一晚，住進舟屋感受地道風情，今篇先分享伊根趴趴走。

旅館以間人蟹餐出名，我來的時候唔係季節，無得食，不過心想能做出美味蟹料理的廚房，做其他料理都應該會出色，所以决定食好d，點個「豪華絢麗。夏之黃金食材」套餐，剩係個名已經好有氣勢，結果都無失望。

(旅館外觀，建於小山坡上)

(餐廳在沙洲上，傳統日式建築)

從來對於京都的認知都係古都寺廟，最遠都係去到嵐山，以為京都就係咁大。到近年至知原來京都府範圍廣濶，去到海邊的丹後半島，伊根町同舞鶴都係京都的一部份，歸納為「海之京都」。今次將呢部份規劃為三日兩夜的行程 ： 欣賞日本三大景之一的天橋立、丹後半島温泉酒店看日落、舞鶴賞紫陽花。結果天公造美，三個目標順利完成，先來分享天橋立半天遊。

睇報導介紹話套餐豐富抵食質素高，滿心歡喜一早訂位，點知首先自己搞錯以為豆乳鍋即係湯葉鍋，其次係好豐富的套餐原來要預訂，再加上負責招待的侍應又落錯單，食物不如預期已有點失望，好彩失望並非食物本身。豆乳湯底香，豚肉薄，配上又香又新鮮的宇治金葱，不俗的火鍋。

日本對我的吸引力之一係四季分明，每個季節都有不同景色，又除左冬天以外，每個月份都可以欣賞不同花種，今次6月時節，到紫陽花（即係繡球花）出場。宇治三室堂係京都賞紫陽花名所，當日風和日麗，加上係週末，非常多人，可幸日本人相當守秩序，行得舒服。

雖然我唔係拉麵迷，不過若係名店都會去試，湊下熱鬧。呢間聽講係京都排頭幾位的拉麵店，咁啱又去開一乘寺，當然要食。平日下午，等左唔夠5分鐘就有位，一人一碗，我選極雞。雞，團友選極雞。魚，個湯底真係好特別，杰撻撻，講真有點似嘔吐物，從未見過，溝埋住麵真係成pat嘢咁。食落其實係好濃的雞蓉湯，但又出奇地唔油膩唔太口渴，叉燒都唔錯。好多食客湯都飲埋，見哂底，個我地就食唔哂，若我唔係前一晚食滯左，應該可以完成。但團友就話就算肚餓都完成唔到。所以話，口味真係好個人。

(酒店在內街，外觀平實)