Foodie 生活雜誌

4/2017光顧

每日特價美食

9/2016 光顧

唔知點解安南比我的印象係好貴，可能覺得係好心地集團，唔應該咁貴，雖然口碑唔錯，都一直無去。今晚原本又去樓上簡單人生開婦女會，但見安南無限用餐時間，即管試下新嘢。裝修幾靚，好有殖民地法蘭西風味，估唔到又幾好食喎，所點食物係一般菜式，飲品石榴冰我唔敢講係真材實料，但起碼唔係化學水，柚子沙律新鮮，春卷熱辣辣，蝦餅彈牙，燒牛肉濱海牛肉香蒸米粉滑，係個田雞焗飯乾左少少，整體唔錯，下次可以試下其他特色菜。

石榴冰

7/2016 光顧 

一間裝修得好女仔的越南餐廳，佈置清麗可愛，位置在龍崗道尾，旁邊係車房，夜晚黑麻麻，唔知道的都未必會行入條街，我行過幾次，見店內靜英英，小貓幾隻，諗住又係得個樣，今次因為實在諗唔到食咩，唯有搏一搏。小店由兩位小姐經營，好用心機佈置店面，一杯一叉都花過心思。好彩食物味道都唔錯，只係稍嫌食物份量小左dd。我今晚食的蟹膏蟹肉米線，鮮茄湯底香濃，米線滑，唔錯。朋友點的慢煮牛肋條飯，牛肋條入味，當然唔係好食到識飛，但已比好多餐廳好，起碼比錢比得順氣。下次要試下法包。一間放滿心機的小店，但晚上人流唔多，所以略盡綿力推一推，希望小店keep到。

3/2016 光顧 39越南屋@油麻地

我去食越南菜最主要係食牛肉河同春卷，若果呢兩樣都唔得，就唔會再幫襯。呢間春卷足料，炸得剛剛好，上枱時都熱辣辣，生菜大大塊。牛河湯頭淡，以我的標準就唔係好得，好在食完唔太口喝。其他小菜都唔差，勝在價錢平，去開呢頭又想食越南菜都可以一試，餐廳茶記格局，坐得較迫。

2/2016 光顧

知道有新開的越南牛肉河店，被讚到上天，當然要立即試下。店子位置有點隱閉，隱身在排檔後，新派裝修，座位以吧枱型式排列，快食快走。主打係牛肉河，另外有小食選擇，用紙仔落單，可選配料、粉類、追加配菜，似車仔麵，新派的就係多選擇，不過個人就喜歡成碗上，無得揀，配料係咁就係咁，感覺較實在。（唉，奴性的表現？）我只係食左碗生熟牛肉河，$68無加一，有水供應，味道可以，但唔會吸引我回頭。

11/2015 光顧 

食店在新羅寶隔離，裝修外型突出，有幾個鳥巢狀坐位，但每次幫襯新羅寶時行過都唔見有人，冷冷清清的。今晚諗唔到食咩，想起呢間。坐低收到兩個餐牌，原來同隔離百樂小館互通，餐牌都係互通，即係可以點選兩間食店的食物，一雞兩味。侍應服務態度親切，個別食物用料味道不俗，不過又係份量細，在我同另一個朋友唔肚餓的情況下，四個人點六個菜先係剛剛好，而且價錢唔平。東南亞菜水準比中菜高 (鹵水鵝無影相 細細碟，肉靱嚡口)地方清靜，幾好坐。

4/2015光顧 

呢間係安全店之一，想食牛肉河就會去。又唔係特別好味，但水準穩定，湯頭幾甜，有齊金不換，青檸同辣椒粒，食完唔口渴，算係咁。通常叫個春卷，加碟菜，飲品買一送一，唔使諗。

總共光顧過兩次，第一次嘗過燒雞，香料味重，雞肉頗滑，