Foodie 生活雜誌

近年開左好多台灣菜餐廳，對於喜歡食紅燒牛肉麵的我又多咗選擇。小店聲稱唔落味精，仲有圖教埋點食，好認真。我點左牛筋牛肉麵，加溏心蛋再加甜品，出品不俗，雖然碗麵要$90，但想到同碗日本拉麵差不多價錢，就坦然接受了。

朋友仔住附近，買外賣上佢屋企食，揀左呢間粉麵店，牛雜軟稔入味，湯底濃而不口渴。魚片頭彈牙，炸得香口，魚皮脆香，整體出品唔錯，今時今日好難搵似樣的粉麵店，下次有機會坐低食試真d。

7/2023光顧

好似幾受歡迎，要排隊又多外賣，我一人食，排第一，不過轉眼已排左六七個。車仔麵配料選擇多，作為內臟王，我點左牛大腸、豬粉腸及豬潤，米線、滷水汁加潮式辣油。一上枱見湯太滿已打折扣。食落全無辣味，應該忘記加辣油，唔緊要，枱面有，自己加。牛大腸肥美，滷得頗甘香，不過豬潤及豬粉腸鞋口，米線太諗，湯底有味精feel，試過就算。

5/2023 光顧

睇開幾中肯的blogger介紹話呢度的牛腩「無得輸」，咁梗係要試下，可能真係好好生意，七點左右來到好多嘢食都賣哂。點左碗牛腩魚旦手轆魚麵，但食唔到無得輸的崩沙腩。我嫌牛腩膩，湯頭口渴，反而手轆魚麵幾好食，質感似食緊魚旦，好似食左好多條魚旦咁，好得意。

5/2023光顧

終於喺港島區開分店👍🏻新店又大又寬躺，攞位落單全面電子化，好方便，水準同九龍店一樣，以後又多一間安全店，真開心。

4/2023 光顧

動線轉到港島東，要儲番幾間心水店，只能慢慢遂間試，今次試食粥。餐廳出名貴妃雞生滾粥，用瓦煲上，加埋炸两及飲品，一個$62蚊的早餐，當午餐食都算抵食。餐廳有小菜提供，之後帶左喜歡食茶餐廳的食友來，我好少食茶餐廳，但食過兩餐都覺得ok，暫時可列入安全店。

3/2033光顧

我鍾意食豬什粉，朋友介紹話呢間好食，當然要去試。餐廳開業多年，好多熟客，好好生意，非繁忙時間都要排隊，外賣又多，所以兩點幾已經有幾款豬雜賣哂。湯底清甜，不過我嫌豬雜切得細舊，碎濕濕咁無咬口，都係食開的啱我。但因為個湯底好，食其他粉麵都會唔錯👍🏻餐廳細細間，主要坐後巷，不過算乾淨，香港特色

3/2023 光顧

之前去漁灣邨街市熟食中心食牛雜麵的時候，見呢間粥店勁多人幫襯，仲好多人點炸兩，梗係要來試下，點知炸兩都係一般，有點失望。

3:2023 光顧

餐室出名食牛腩，慕名一試。牛腩柔軟啖啖肉，但食完比較口渴，唔多啱我。值得一提係侍應服務好好，好有禮貌。

2/2023光顧

柴灣似乎無咩好食，正當絕望之際，居然發掘到呢間牛什粉。湯底清，唔會好咸，牛雜柔軟入味，算係咁。小店喺街市內，可以點另外鋪頭的食物，舊式街市排檔，好耐無去過。不過只開到下午兩點，逢星期一、五休息，應該都無乜機會再嚟。

1/2023光顧

唔係朋友介紹都無留意過呢間粥麵店。餐廳出品質素不俗，真材實料，唔會食到成口味精，價錢合理，安全麵店。

12/2022光顧

店名有元朗二字，但𣄃下兩間店都喺港島，一間喺灣仔，一間喺鰂魚涌，太后試過鰂魚涌店話麻麻，咁我就去灣仔店囉。豬什乾淨，胡椒湯暖胃，菜甫香辣，整體不俗呢👍🏻

大埔墟街市內的小檔口。魚湯有魚味，食完唔口渴，鯪魚球即炸，三十幾蚊一碗，絕對係街坊之選👍🏻

11/2022光顧

老媽拌麵，試過喺超市買來食，幾好食。見到近年開埋門市，諗唔到食乜的情況下又試下。我當日只係求其點碗麵，朋友點左個菜，食物交行貨，可能係我點菜的問題，完全食唔出台灣風味，又係嗰句，勝在唔使自己煮自己洗，不過若可以的話，我選擇回家煮麵。

9/2022 光顧

醫肚要快靚正，我一定揀食粉麵，但粉麵店唔係間間入得，好多都係食到成口味精，所以食到好的要袋住幾間看門口。唔知邊個介紹我去呢間，湯底味道可以，自家製墨丸食到墨魚粒粒，但份量少，一碗得四粒，仲要細細粒，牛筋夠稔，可以入去又唔會伏的店

8/2022光顧

7/2022光顧

近年開左好多餃子店，成日話租貴人工貴，一碗餃子收四十零蚊，真係咁好賺？定係外賣生餃有得做？真係唔知。呢間餃子店由幾個年輕人主理，餃子大大隻，湯餃同煎餃一樣，包到似窩貼咁，魚湯底幾濃，煎餃太油膩，味道不過不失，點都好過買超市雪藏餃，若我住附近都會再幫襯，不過就無必要專登入來食了。

6/2022光顧

做孤獨試食家的同時，都會遇到其他孤獨試食家，萍水相逢，從中交換飲食情報，幾有趣。餐廳原本on the list，但過左一排都無去，所以delete左，點知有日飲咖啡時同另一試食家傾開，佢話唔錯，又試下。多款餃子小食選擇，湯底唔錯，餃子大隻，皮薄饀多，唔算好好，但可以一試。

4/2022光顧

晚上一條友，唔想食得咁heavy，食餃子最啱。行過見到餐廳新開業，標榜手工餃子，家庭式經營的小店，地方簡潔。提供多款餃子、小食及飲品，我只試左碟蒸餃，味道不過不失。呢類小店做街坊生意，附近好多食肆，競爭激烈，希望做得住啦。

4/2022光顧

喺開飯網四圍loop，睇到呢間幾合眼緣，即管試下。街坊小店，價錢實惠，味道平和偏淡，食完唔口渴，總好過食到滿口味精。主打餃子麵食，又有飯團、芝士蛋糕，好多選擇，食飽後去附近cafe 飲咖啡，咁就唔使食cafe的高價簡餐了。