抖室
一套睇得心痛的電影。故事令我想起奥地利獸父禁錮女兒24年的事件，當日聽到新聞已經非常震驚，後來知悉有本書「被愉走的人生」，差不多的悲劇，由加拿大籍獲救少女撰寫，不過在圖書館借回來後結果都不敢打開，一頁未讀就還書，知道此片敍事角度不同，先至夠膽睇。
目前分類：電影 (97)
- Mar 19 Sat 2016 18:30
電影 : 抖室
- Mar 18 Fri 2016 17:25
電影 : 功夫熊貓3
來到第三集，故事仍然係江湖恩怨加温情，全世界靠熊貓呀寶救命。今集呀寶見番老豆，認祖歸宗，以為老豆識氣功，跟佢返回熊貓村學功夫，結果當然係經過重重波折後再抗敵成功。今次故事主題係「我是誰」，人好多時候會因為環境影響而忘記初衷，甚至為左遷就社會的要求，漸漸地忘掉了我是誰，以社會的標準為標準。其實天生我材必有用，每人都有自己的優點，只要找出自己的強項，專心發展，一樣能夠成功。 (題外話 : 成日覺得呢個世界唔會個個都係醫生律師，若果係咁，邊個幫忙掃街起樓？每個人都有自己的強項，每一個職業對社會都有貢獻，可惜現時的風氣唔係咁......又發勞騷，STOP!)。全片畫功一流，畫到隻隻熊貓的毛真嘅一樣，隔住個銀幕都feel到佢軟綿綿，熊貓表情生鬼，武打塲面夠氣勢，塲景華麗得來不落俗套，中國的金碧輝煌，又龍又鳳，若配搭得唔好就會變得老土，套戲以中國特色為主，但從無此問題，不論上集的鳳凰定今集的翡翠兵團設計都好靚。呀寶首集學功夫，上次做龍戰士，今集做氣功師傅，集集升呢，真係長拍長有。
- Feb 13 Sat 2016 21:27
電影 ： 歡姐當自強
人紅真係運氣好到沒法擋。一套粵語長片一樣劇情的戲居然可以題名奧斯卡最佳女主角，旁邊的粒粒巨星都變成儍瓜一樣的大配角，我實在不懂欣賞，勞倫絲小姐萬歲！講完。
- Feb 12 Fri 2016 16:06
電影 : 東京未婚妻
法國與日本都係我喜歡的國家，呢套戲將兩個國家的文化差異放在一起，當然有興趣一看。女主角愛美麗係比利時人，雖然在日本出生，但至5歲已回比利時居住，之後一直對日本文化著迷，至20歲就回日本，以教法文為職業，之後遇到富有日本學生再成為情侶，男友帶佢深入了解日本文化，慢慢地，亦認清理想與現實係兩回事，加上後來的三一一事件，更加令愛美麗明白自己只係一個外人。故事簡單，套戲普通。不過令我有點慨嘆，總認為旅行與生活係兩回事，就算你如何喜歡某地方，一旦在地生活，面對日常瑣事，心情就係兩回事。曾經聽人講過，旅行就係由一個你住得悶的地方去一個對方住得悶的地方（一笑），覺得好真實。好多時聽到有人想移民，但大多數係因為厭倦既有生活，嚮往另一地方的美好，但好少係聽到因為了解同清楚另一地方而決定移居。講到尾，都係為左逃避罷了。好在，雖然發生左好多事，但我仍然熱愛香港，所以繼續去旅行就好了😊
- Feb 12 Fri 2016 00:21
電影 ： 山河故人
睇個戲名就有蕩氣迴腸的感覺，但睇完後完全無此感覺。故事講述中國1999年至2025年的經過，過程中的經濟起飛，令人心改變，向錢看，家庭關係疏離，故事亦伸延至10年後，即2025年，下一代已移居外地，展開另一種生活，但又帶出另一個文化𠄘傳的問題。故事看似大題目，但一路睇一路都好平淡，平淡得來又好似無重點，都幾悶。
- Feb 10 Wed 2016 17:52
電影 : 焦點追擊
焦點追擊
故事由真人真事改編，講述波士頓環球報的焦點新聞組重新報導多年前的波士頓神父性侵犯兒童案件，當年事件不了了之，後來新接任的總編輯重提事件，再委任四位記者負責採訪，最終成功揭發整件事的真相，令受害人能夠取回公道。整件事其實人人皆知，只係教會運用權力去掩藏一切。睇完之後，令我回想起
曾經記者在我心目中係一個專業，不偏不倚，如實報導真相，發掘社會不為人知的一面，保護公眾知情權，可惜.....一切一切就如本片，已經係2001年的事，係歷史。今日可以睇到的都只係立場新聞，先有立場才寫新聞。可能仍然有好多有心的記者，但在今天的社會都恐怕有心無力吧。今次飛鳥俠與變形俠醫交出漂亮的成績表，演出寫實得來有戲味，尤其是Mark Ruffalo真係演乜似乜。- Feb 10 Wed 2016 00:16
電影 : 沽注一擲
一套恐怖片。講述美國房地產貸款引發的金融海嘯。雖然過程及結果已知，但一路睇，一路仍然心驚膽顫。片內有好多專業名詞，我一知半解，但無損興致，愈睇愈投入，劇情緊湊唔係來自觀能刺激，而係你一路跟住劇情走一路會心驚膽顫，就算結局一早已知。數字不騙人，但當全個金融業加上政府都夾埋一齊欺騙時，仲可以講咩？幾位主角處於眾人皆醉我獨醒的位置，但就算事後証明到自己有幾叻，幾眼光獨到都好，中間的壓力又係咪係人都抵受到？尤其當你明白就算贏左會比輸更慘的時候。荒謬的係世界無從錯誤中得到教訓，始作俑者繼續飛黃騰達，黑白已分不清，對錯再辨不了，世界只有被貪婪自私控制的時候，無力感日比日大，可以點？唯有不聽不看不理。
- Feb 07 Sun 2016 18:32
電影 : 恐龍大時代
- Jan 29 Fri 2016 08:38
電影 ： 時代教主 : 喬布斯
- Jan 23 Sat 2016 12:13
復仇勇者
一套巨星主演的「人在野」加「王子復仇記」。片長156分鐘，全片用好大篇幅描寫主角一人在野外求生的獨腳戲。但導演拍出氣氛，加上主角路上的遭遇，令我睇得好投入，無悶塲。荒涼的美景更加係本片亮點，全部自然景，大風雪、風雪後的平靜、極光、雪崩，好壯觀，完全拍得出天蒼蒼，野茫茫的感覺。故事簡單，兩個字：「仇恨」。兒子被殺的仇恨，對侵略者的仇恨，種族之間的仇恨。但最可悲就係 : 報仇後又如何？結局都係一無所有，只剩下悲痛。主角Leonardo係我喜歡的男演員之一，佢就好似劉青雲咁，做得好係應該，只係睇佢有幾好，呢套係好，但就唔覺佢特別好，不過實在要向佢致敬，因為以佢今時今日的地位與財富，實在無需要拍套咁辛苦的戲，就算你話佢搏攞獎都係咁話。雖然套戲唔可以話非睇不可，但睇得到全片上下包括所有演員同工作人員的心血，拍得咁辛苦，而我卻可以安坐電影院享受，我真係覺得好抵睇。不過部分鏡頭非常血腥，要有心理準備。
- Jan 01 Fri 2016 11:17
電影 ： 我的少女時代
- Dec 11 Fri 2015 12:37
電影 : 拉麵之神
食料治愈系@香港亞洲電影節2015的其中一套電影。其實係一部記錄片，有關拉麵店主人山岸一雄先生的故事。山岸生命中大部份時間都在自己開的拉麵店「大勝軒」中渡過，因為份量大，湯底美味，拉麵店極受歡迎，長期排滿人龍。山岸每天辛勤工作，一年只休息數天，自從青梅竹馬的妻子逝世後，煮拉麵更已成為佢的唯一使命、寄託，而佢亦將與妻子的回憶冰封。多年來日本不少人慕名到岸山的店取經，山岸從不吝賜教，甚有人情味。結果之前種的因到年老時就嘗到果，由徒弟照顧生活。拉麵店後來因為社區重建而光榮結業，山岸所教出來的徒弟之後再從新開店，店子得以延續。
香港都有好多雲吞麵之神，車仔麵之神。上一輩的人就係會為生活在店內貢獻大半生，養活一家人，每日生活就係守住間鋪，日出而作，日入而息，社交圈子就係客人街坊，生活簡單，店鋪生意就係生活的全部，盡心盡力去做好每一碗麵。隨住時間流逝，所有神都老去，時代改變，社會富裕，生活條件好左，選擇多左，做生意的條件亦不同了，今時今日仲可唔可以孕育出xx之神呢？
- Nov 14 Sat 2015 11:38
電影 ：兩生花 / 情書
書本、電影、音樂係腦袋的養分，亦係記憶的一部分。雖然好多時候睇完就忘記內容，但一個畫面，一段音樂或一句文字會不知不覺間留在腦海中。對於我，其中一部好有記憶的電影係「兩生花」，當年睇完雖然唔明白，但居然覺得好好睇，印象深刻。得知今年「夏日電影節」重影，立即訂票觀看。套戲由我當年做偽文青到今日的偽文中，都係睇唔明。但仍舊被戲內的配樂，鏡頭下的唯美畫面同戲內的神秘氣氛與感覺吸引，兩位女生在廣場相遇的一塲戲更成為腦海中的畫面。即係由偽文青過渡至偽文中的我對電影的認知係毫無進步，分別只在於偽文青時對巴黎及Krakow 的印象是由電影而來，到偽文中時，已踏足過此兩片土地，留下美麗回憶。
- Nov 14 Sat 2015 11:05
電影 : 萄醉北海道
食料治愈系@香港亞洲電影節2015的其中一套電影。全個系列睇左其中四套，呢套係我最唔欣賞的。電影講述指揮家因為聽力問題無法繼續音樂事業，帶住絕望的心情回北海道家鄉釀造葡萄酒，最終走出陰霾的故事。全片節奏緩慢(習慣了)，前半部有一搭沒一搭的，場景，佈置同其他角式的衣著都頗童話唯美，但男主的故事又好現實，兩者加埋就有點突兀。片中女主角演出造作欠自然，近年喜愛的男演員染谷將太飾演男主角的弟弟，演出木獨，全無神彩。北海道的美亦未能夠在本片中呈現出來，跟同一系列的另外一套「森之光食」差遠了。
- Nov 10 Tue 2015 18:19
電影 : 清酒的誔生
- Nov 09 Mon 2015 07:23
電影 : 森之食光 : 夏/秋，森之食光 : 春/冬
- Oct 24 Sat 2015 20:40
電影 ： 換諜者
Steven Spielberg加Tom Hans，揾唔到唔入場的理由。故事講述在美俄冷戰期間，一個律師擔任談判者，交換間諜的故事。故事當然又要宣揚美國人是何等有「公義」，不過我真係好難相信一個律師會為左「公義」兩字去如此以身犯險，當然首要係佢本身有高尚的情操，最重要係當事情牽涉入最高領導層時，好多時都身不由己？Tom Han's 毫無難度的演出一個公義機智的大律師，飾演蘇聯間諜的演員亦渾身是戲。片長141分鐘，前半部頗沉悶，對白多，歷史大時代背景的間諜故事，要交代的事好多，好在間中有點幽默對白，唔太嚴肅，後半部至開始入戲。呢類大時代背景的戲，每次看後都無限唏噓。
- Oct 05 Mon 2015 00:35
電影 ： 海邊咖啡屋
非常平淡的調子，典型日本小品，但卻出自台灣人導演。故事講述主角自小因為父母仳離，跟隨母親生活後與父親再無聯絡，後來得知從事捕魚業的父親出海失蹤，決定由東京回到故鄉，在父親遺下的海邊小屋經營咖啡店，等父親回家。中間認識了經營民宿的單親母親及其子女，發展出友誼，互相幫助。全片一個調子，劇情無大起伏，就似在旁觀看他人的平常生活，但又唔覺得特別悶，日本片的美指一向唔錯，美麗的風景配雅緻的咖啡小屋，全片瀰漫住憇靜舒服的氣氛，淡淡地，淡淡地，套戲就完左。
香港食食食 (25)
