Foodie 生活雜誌

有80年歷史的築地魚市場快將搬遷，此紀錄片在搬遷前作一個總結。全片內容從築地市場的歷史至市場交易至日本飲食文化至教育至𠄘傳都有觸及。其中職人文化令我感受至深，除左專業以外，重有尊重。尊重自己，尊重他人，尊重工作。因為尊重，自然會著緊，有要求。買手對漁民尊重，希望為漁民努力捕捉的魚賣到好價格、廚師對中介買手的尊重，對其專業知識的信任、魚販與魚販之間的尊重，大家抱住良性競爭的態度，全部都感動到我。築地，除左係一個遊客熱點外，仲係一種文化，市場交易係靠人與人之間的關係去經營，就如其中一位魚販所講 : 做生意係靠每天面對面的溝通，並非只靠電話電腦，今時今日更覺可貴。睇完電影就似眼睛享受左一塲盛宴，築地市場的運作令我眼界大開。誠意推薦愛吃愛日本文化重人情味的你。

一套戲，就算幾大卡士，幾好氣氛，幾勁場面，劇本故事唔好都係死症。上集已經睇到炒蝦拆蟹，今集又係玩泥沙咁，全部高層為威喂，挫大dee咁話邊個做呀頭就做呀頭。高層個個神勇，若果警隊真係咁，真係準備定一打接班人都唔掂。故事有幾犯駁都無謂講，預左。但戲內各人都用力地演，個個面容繃緊，除左德彬同發哥叫鬆少少，其他人個個死老豆咁feel，莫非導演要求？唔知點解會攞多次影帝的郭先生將處長的冷靜沉著發揮得淋漓盡致，因為全套戲從頭到尾都係一個表情：無表情，睇到火起。我已經盡量以平常心睇，但睇到宇宙無敵爛的結局真係忍唔住笑住爆粗。睇呢套戲純粹為左陪朋友，若佢再要我陪佢睇第三集，我會絶交😡😡

 一套年輕人做主角的紀錄片，記錄左9位10至24歲青年的想法。片中幾位年青人無論來自何種背景，處境都係努力去達成成年人對佢地嘅期望，當中一個中五女生感嘆唔想跟大隊走，但慢慢自己不得不隨波逐流，仲講到喊，各位主角都有點迷失。自己無子女，感受唔到父母的憂慮。但我亦年輕過，回想自己從小就渾渾噩噩，無理想無目標，父母對我毫無要求，所以我的生活同思想都好簡單。當然成長的路亦有困難要面對，但活到今天，雖然我唔係專業人士，對社會亦無貢獻，但起碼我快樂。人長大了，漸漸忘記小時候係點過，好多時都不期然將成人的標準放在小孩身上，見到呢個情況都好戥佢地可憐。入塲睇呢套電影係想了解多點年輕人的睇法，睇完後，代入主角，有點窒息的感覺。幾位青年，幾個不同故事，唔太深入但足到重點，無批判性，純粹記錄，讓觀眾自己感受，就似睇完一集鏗鏘集。

故事簡單得有點悶，講的不外乎係生存、成長、復仇、情義。不過重點係CG特技，講到咁勁，忍痛花百幾銀入塲睇IMAX3D，果然無令我失望，整個森林充滿層次感活現眼前，喜歡動物的我更加睇得開心。講原則的狼首領、慈祥的狼媽媽、亦師亦友的黑豹、玩世不恭又極有義氣的黑熊、追求權力的猩猩王，殘暴的老虎、全部活靈活現，非常迫真，唔講我真係以為動物識講話，連口型都夾埋。不過最勁係個細路，點樣對住塊布做戲？全片製作認真，畫面豐富，睇咁多年森林戲，終於見到人類身上有傷疤。視覺效果精彩，宣傳話比阿凡達更勁，但我就認為整體嚟講都仍然覺得阿凡達好d。片尾的工作人員名單非常長，成日覺得睇電影好抵，用左咁多人力物力製作一套電影，我就舒舒服服坐在涼住冷氣在欣賞，真係抵到爆炸。

東京家族之後再來嫲煩家族，兩套戲都係想點出日本的家庭問題，相比起東京家族的冷漠，嫲煩家族明顯熱鬧輕鬆得多。家家有本難唸的經，三代同堂，各有性格，每天相處，好多事情變成習慣，尤其係夫妻關係，遷就與包容，唔係單方面，一方死忍一方老馮，欠缺溝通，裂痕日深，慢慢成為計時炸彈，終有一日爆發。如何拆彈？又係最老土的方法 ：愛與溝通。今次爺爺（橋爪功）演出非常生鬼。平淡輕鬆又有意思的一套戲，久石讓的配樂令電影錦上添花。

登山係高危活動，能登上珠峰係登山者的夢想，但每年總有人遇害，能夠登頂的，三分實力七分運氣，頂級高手都要聽天由命。本片故事簡單，一班熱愛登山的隊友橫跨十年的經歷，大家一起打拼登過多個險峰，生死與共。其中一對亦師亦友的好拍檔多次結伴攻頂，可惜一次意外，兩名徒弟帶隊時命喪山上，登山隊亦因此解散，隊員各散東西。一年後，登山隊長決定上山帶回徒弟屍體回家.......故事無特別，但拍得真摯感人，前半段輕鬆惹笑，後半段感人催淚。有關登山的戲睇得多，大多係荷里活製作，最有印象的已經係多年前的vertical limit，今次韓國製作都拍得精彩，加上韓國人特有的慷慨激昂情緒，令氣氛更感人。結果我喊濕左張紙巾。