Foodie 生活雜誌

依依不捨地離開夢幻温泉旅館後，再繼續旅程。先照原定行程去久住花公園睇花，不過昨晚天氣係零度，原本想睇的花氈當然無得睇，園內的花零零落落，好彩叫做有個小小的温室同一d記念品小店，無無聊聊居然行左兩粒鐘。睇唔到花氈，但又好彩遇著櫻花滿開的日子，跟住網絡上推介去熊本県野外劇場アスペクタ賞櫻，劇場係室外表演塲地，今日無表演，好靜。塲內有好多櫻花，開得燦爛，可惜天陰陰，而且櫻花比較分散，唔夠澎湃。影完一輪相就出發去今晚住宿。晚飯前去左當地的福祉温泉泡湯，類似老人中心，仲試左森美旅行團介紹過的電氣風呂，好搞笑。之後喺旅館小屋食個精緻晚餐就結束一天旅程。

旅館提供美麗的環境，舒適的房間，當然少不了美味的餐點。食材唔算高級，但製作認真，擺盤精美，味覺與視覺的享受，環境舒適，服務一流，令整個住宿體驗更完美。

旅館只有11間客房，全部在獨幢小屋內，分佈於旅館竹林四周，環境幽靜，每間房的面積及設計都不同，所有房間都附設風呂。房間為傳統日式風格，高雅大器，亮點係屋內的品味小家電、慷慨的飲品提供及貼心的房間設計，舒適自在。入住過後，覺得室雅何需大，適量地加入精緻的小家電及家品，會令生活更添樂趣。

旅館內每個房間都附設風呂，所以旅館不設大浴場，只有兩個貸切風呂 : 竹林之湯及洞窟風呂，可於入住前預訂時間享受。其中竹林之湯我在網上睇相已心生嚮往，到身處其中時，感覺比相片更有過之而無不及。至於洞窟風呂我無去，留比朋友夫妻享受，感請佢地有影相比我做記錄，不過佢地話一般，竹林之湯正得多。

近年愛上泡温泉，去過好幾個温泉鄉，最喜歡憇靜隱秘的九州黑川溫泉。之前到過黑川温泉鄉，遊人不多，好清靜，今次到訪旁邊的白川温泉，無温泉街，只入住一間旅館 : 山荘 竹ふえ。一間連温泉旅館達人都要一而再，再而三入住，實在好奇可以好到咩程度。旅館位於深山竹林內，依山而建，佔地廣，但只有十一個房間，被滿有禪意的氣氛包圍，非常幽靜，令人身心放鬆，好relax，絶對值得入住​🏻

早餐後出發往九重夢大吊橋，吊橋在深山，揸車要個幾鐘。落車後發覺幾凍，又大風，立即上車加番件衫，出發前睇過天氣預報，明明話旅行呢幾日係六度至十幾度，點知來到吊橋原來得四度！重要好大風，吊橋在山谷中，行到中間食正風，真係唔得佢死！不過作為一條人行的專用吊橋，又確實幾宏偉，吊橋架於深谷上，好有氣勢，最重要係感覺安全，行過對面，再上去展望台，我地幾條友左影右影，都玩左好耐。喺進入吊橋途中，見到有間賣河魚的小店，離開時就決定喺度食午餐，河魚肥美，師傅手勢好，無論燒同炸同樣美味，食完後就早早去温泉旅館check in,因為今日佢至係主角👍🏻

比起Richmond，我更喜歡JR Kyushu Hotel Blossom 集團旗下的酒店，曾入住宮崎，博多的分店，乾淨舒適，感覺良好。今次的大分店亦非常滿意，雖然房間比想像中細，但亮點係頂樓的spa，非常舒適。交通方便，與JR車站零距離，泊車亦方便，價錢合理，物超所值的住宿，我好喜歡👍🏻

一早起身，食完早餐去攞車，搞東搞西，中途又去下公路上的PA 同SA shopping，去到明礬温泉已經係下午三點幾，連飯都未食，大失預算。因為別府的地獄温泉之前行過下，今次諗住特別點，去下附近的明礬湯の里，可能因為時間唔夠又心急，唔知點解突然跳掣失憶，見到明礬地獄就以為自已到左，覺得無乜野睇，只有採湯之花的小屋較特別，但又唔入得去睇，結果喺屋前影幾張相，食完個出名的地獄布丁就走了，其實主角明礬湯の里我無去，超失敗。之後喺別府地獄谷選左個血地獄參觀，再去鉄輪温泉食地獄蒸，之後就去酒店check in了，今晚的酒店雖然在市區，但都有温泉設施，要早點去嘆下。

高級版燒肉店，提供上等質素的牛肉，有三款套餐選擇，分別係8500yen, 10000yen 及12000yen，我習慣選中間價，取其中庸之道，價錢的分別當然就係牛肉。我見隔離枱比我多左舊細細的厚切steak，應該嗰舊肉值2000yem。燒肉由專人代燒，火喉剛好，店員會介紹每件牛肉的特質，我當然聽唔明啦，不過都食得到好味的，每塊肉的處理方法都不一樣，花款多，味道好，滿意的一餐。

坐十一點機，三點幾到達福岡，去到市中心喺酒店settle down 後已經5點，快快去我喜愛的cafe del sol食pancake，水準依舊好。之後去今泉的小街shopping ，因為訂左九點晚餐，團友們未能於驚安中盡興，結果飯後再戰，行到點幾鐘，真係名乎其實的血拼，好彩酒店在轉角處，否則行完重要爬遠路回酒店就慘。