Foodie 生活雜誌

(鉄輪温泉公園)

喺酒店嘆到最後一分鐘至離開。先遊別府地獄，原來每個地獄都要入場費，見個樣似荔園遊樂場feel，興趣不大，只去左鉄輪地獄泡個免費滿清十大酷刑feel足浴就離開。在離開別府往湯布院之際突然發現公園兒童遊樂場，我同少爺仔即時歡喜若狂，畢竟嚟左咁多日，一個像樣的公園都無遇過。冒著中暑的危險，大家都玩到不亦樂乎，現今香港的滑梯仲邊有咁高？我自己都玩左好多次！曬個半死之後再上路。點知一上高速就遇上豪華SA站，又逗留左大半個鐘，去到湯布院已經下午，匆匆地食個lunch就行湯之坪，我上年來過，已經無哂新鮮感，只陪朋友行下就算，後來諗番應該去大分県立美術館(OPMA)更好。行到黃昏，店鋪都關門了，就向福崗進發。check in後求其揾間意大利小館食晚餐，之後就休息了。

(創作料理BAN-YA餐廳門面)

酒店好舒服，對晚餐當然有期望，可惜係反高潮，甚至係我咁耐以來温泉酒店中最差的一餐。今次選BAN-YA餐廳的創作料理，諗住來左日本咁多日，餐餐日本餐，不如試點新意思，點知好失望。除左舊和牛好食之外，其他都好普通，餐具亦唔靚，以訂房的價錢計，絶對失望。若大家有興趣入住，晚餐記住選 えいたろう餐廳的傳統日本料理，因為第二朝的早餐好好食，心理平衡番少少。

對別府的印像係傳統温泉街，無想過係海邊渡假feel，以為自己去錯地方。今次入住的係中型酒店，上網揀的時候被酒店簡約時尚空間大的房間吸引，又未試過望住個海浸温泉，最後卜錘。房間超大，最多可以住8人，面向別府灣，好寧靜，可以睇日出日落。房間有私人風呂，聽住海浪聲，再播上自己喜歡的音樂(習慣帶小型speaker去旅行)，美好的一夜。

偉人的故事，動人的友誼。故事講述一個印度籍天才數學家的一生。半世紀以前，一個印度人憑住新破解的數學理論獲劍橋教授賞識，離開妻子漂洋過海到劍橋，為發表學說而奮鬥。當中經歷種族歧視、學院官僚制度，最後雖然名留千古，但本人就享受唔到榮譽了。天才，唔一定係受萬千寵愛，際遇都好重要，兩位主角的友誼令故事情節更豐富。簡單動人的故事，幾好睇。

喺旅館舒舒服服嘆完個早餐先出發。先去坐小火車，若果唔係有少爺仔我相信我係絕對唔會有呢個念頭，因為睇介紹，呢d只係無聊荔園玩意。點知我錯了，居然覺得幾好玩！(我係咪有問題？)觀光小火車好簡單，有兩卡，可坐18人，無遮無掩，在已停用的高千穗火車站出發，經過民居，穿過山洞，去到高千穗峽，亦即係鐵路的盡頭，因為前路已封閉，小火車會往回走，全程約半小時。坐小火車同揸車唔同，有穿過山嶺的感覺，更接近大自然。營運機構又會搞下花臣，在山洞內放幻彩射燈，到左鐵路盡頭又會放番皂泡泡，雖然有點小學雞feel，但我又幾欣賞個心思，為平淡的鐵路旅程加添趣味，最重要係少爺仔都好開心。不過天氣勁熱，差點中暑，但天氣唔好亦唔開，呢個唔係重點節目，若果悠悠閒閒遊高千穗又遇啱天氣好的話，都可以來玩下。

已經停用的車站

(酒藏幾豐富)

晚餐於獨立房食，其實另有大廳，可能因為我地有小朋友，所以比間房，怕嘈到人。晚餐精緻，食材唔係矜貴但味道唔錯，餐具精美(我好喜愛欣賞餐具)，食得好滿意。

(旅館入口)

一向鍾情小旅館，今次又揀左間只有8個房的温泉旅館，經booking.com 訂。旅館位於高千穗峽附近，安排住一晚唔洗咁趕。旅館房間在一間間小屋內，私隱度十足，每個房間內部設計都唔同，價錢亦有分別，預訂時睇清楚。旅館不設大浴塲，每間房都有私人風呂，對住庭園，無景睇，感覺似平時浸浴缸，不過面積大好多。我喜歡大浴場，但朋友就好喜歡呢個私人風呂。除此之外，一切都好滿意，服務一流，早晚餐都唔錯。

一早在酒店樓下的coffee shop 買早餐上車食，麵包好好味。我通常book酒店唔包早餐，喜歡去coffee shop 食，或者去到睇下食物質素再即塲比錢食，價錢同預先訂差不多。

酒店樓下的SAKURA Cafe

JR Kyushu Blossom 集團酒店，上次在福崗住過，好滿意，今次入住集團旗下宮崎酒店。酒店正正在JR站隔離，一條直路行去商店街約15分鐘，沿路係商業區，道路整潔闊大，好好行。房間寬敞，有書枱小梳化小茶几，裝修簡潔光猛，兩隻大窗外望宮崎市景色，被褥舒適，最欣賞個洗手間，夠大之餘仲分開坐厠、沐浴同洗面三部份，沐浴區再分淋浴同浸浴，非常滿意的一間酒店。