Foodie 生活雜誌

今日先去宮古市魚菜市場，行程聲稱有海鮮浜燒，我心目中係好似八户咁熱鬧，去到至知係小市場，當日仲無得燒，好彩有幾檔海鮮檔可以買刺身，團長又食到佢喜愛的新鮮元貝，目標達到。餐後去淨土之濱，沿住海岸線行去海灘，冬日的海岸特別寧靜，陽光伴海鳥飛翔，幾舒服。跟G神食完個豬扒飯午餐就回盛岡市行街。晚餐團友們去食盛岡冷麵，我無興趣，一條友做孤獨試食家去食串燒，再行下AEON就回酒店休息了。

Richmond係我喜歡的酒店品牌之一，通常選房間面積23平方的雙床房，近火車站，房間配套齊備，整潔舒適，價錢合理，去鄉下地方通常租呢個品牌，有埋停車場，唔使諗，今次住盛岡的三人房居然有部LG的衣物護理機，好好玩，張相仲為我呃左九百幾個like，真係開page多年以來首次有呢個數字😝😝

平日的盛岡市晚上好靜，當晚想食西餐，G神揾到啱心水的餐廳又無開，只能憑感覺揀。餐廳係獨棟小店，工業風裝修，小酒館形式，菜式屬多元化創作料理，啱哂愛新鮮的我。我地一行五人點左幾個小菜，份量足味道好，價錢勁平，幾百至一千yen就一個菜，抵過自己煮，若我用香港的物價計，真係唔知佢點維生😅不過睇tabelog 只得3.12分，所以話，有時都要自己試下至知啱唔啱食。

一早去松島海鮮市場食海鮮丼做早餐，之後出發去猊鼻溪坐船仔，又係一個我自己唔會去，跟人去又唔抗拒的地方。原本團長心目中想睇的係冰封世界，可惜今年迎來暖冬，只睇到枯枝。午餐食前沢牛，食完去另一景點 :嚴美溪。景點似荒廢左咁，吊橋停開，涼亭又欄住左，不過見到積雪的溪流都幾靚，係咁二行個圈就走。落番盛岡市已經入夜，靠G神揾食居然揾到間又平又正的餐廳，大家都好滿意，飯後回酒店休息了。

經airbnb訂的住宿，應該係當地人的渡假別墅，平房一層過，兩間房加超大客飯廳，所有家用設施一應俱全。步行五至十分鐘可以到便利店，駕車幾分鐘可到附近餐廳食飯。住宿兩旁係温泉酒店，其中一間提供日歸温泉。民宿寬敞舒適 ，若去松島住宿，係一個好的選擇，多謝團長揀到好民宿👍🏻

一早坐8點出發的JR上仙台，大家都係晨型人真係好，早出發感覺時間好用得多。去到仙台攞車開始自駕遊，先去摘士多啤梨，真係夾下唔同人至有新體驗，我自己排就一定唔會去，但原來又幾好玩，邊摘邊食爽YY。之後去松島，我之前去過，無乜好做，但都叫做有四圍行吓，但團友們行完瑞巖寺食下嘢就算，居然連個海都無望過😅。之後就直去airbnb住宿，晚餐去買七仔搞掂，雖然住宿無温泉，但附近有日歸温泉，作為温泉精的我當然唔放過，浸完終於感覺到開啟旅遊mode了。

事緣我喺雜誌見到有個以白子為主要食材的「痛風鍋」，愛白子的我豈能錯過。餐廳以食貝類為主，年輕廚師掌廚，有板有眼，態度友善認真，點左套餐再追加其他食物，貝類新鮮，但痛風鍋則同相片好有出入。我地好早食，走的時候已坐滿客人，其中一個客人同我地傾偈，仲話餐廳係區內名店呢👍🏻

喺網上訂位後準時到達，侍應先安排喺咖啡座飲杯水，準備好後就入餐廳。一般法國餐廳的高雅裝修，窗明几淨，有天然光，好舒服。侍應有禮服務好，菜單融入不同食材，水魚、白子都有，幾驚喜。食物烹調合度，醬汁配合得宜，味道好，超級飽。食足差不多三個鐘，坐都坐到攰😅一次不俗的經驗。

今日係食完行，行完食，loop 足4次就完😅呢日食左四餐，夾埋用左大半日，最後唔夠時間做我的小電車遊，只停得一個站探招財貓，浪費左張一日券，好彩上天比我坐埋招財貓電車，叫做多個景點。

今日同團友分道揚鑣，我同團友P一組，大家都係晨型人，又喜歡散步，所以一早由民宿行半個鐘頭去食早餐，好舒服。途經上野公園，我無深入地行過上野公園，離遠見到呢舊嘢，唔知係乜？

今次一行五人，若住酒店要分三間房，住民宿相對平點，所以團長訂左呢間民宿。地點喺JR上野站行十五分鐘的民居内，附近有食店及便利店，生活機能唔錯。若坐skyliner從機場來就喺上野站出，其實去完街應該喺JR鶯谷站或地鐵入谷更近。

 民宿裝修簡約，地方清潔，分兩層，有兩間房，但間格特別，介紹聲稱可住八人，若真係住足八人，一定崩潰。當然好似我地咁住五個人係可以接受，但其中一啤要瞓廳，其他人去厠所出出入入好騷擾，我住過就有點保留了。